लन्डन (एजेन्सी) – फिफाले वर्षका उत्कृष्ट खेलाडीलाई सम्मान गर्ने अवार्ड सम्मेलन ‘फिफा द बेष्ट’ को निर्णायक मण्डलमा ब्राजिलियन रोनाल्डो र इंग्ल्यान्डका पूर्ण मिडफिल्डर फ्र्यान्क लाम्पार्डलाई चुनेको छ । रोनाल्डो र लाम्पार्डसहित पूर्ण इंग्ल्यान्ड प्रशिक्षक फाबियो कापेलो पनि निर्णायक मण्डलको हिस्सा रहनेछन् ।

लाम्पार्ड, रोनाल्डो र कापेलोले पुरुषतर्फका उत्कृष्ट १० खेलाडीको सुची तयार पार्ने छन् । उनीहरुले पुरुषतर्फका १० उत्कृष्ट प्रशिक्षकहरुको सुची पनि तयार पार्ने छन् । महिलातर्फ भने मिया हाम, सुन वेन र मिया ज्याकमानलाई सो जिम्मा दिइएको छ ।

१०-१० उम्मेद्वारको सुची २३ जुलाईमा तयार हुनेछ र सोही दिन सर्वसाधारणहरुका लागि भोटिङ पनि खुल्ने छ । समर्थकहरुको मत सहित, राष्ट्रिय टोलीका कप्तानहरु, प्रशिक्षकहरु तथा २ सय भन्दा बढी मिडियाकर्मीले आफ्नो मत खसाल्ने छन् ।

अघिल्लो वर्ष क्रिस्टियानो रोनाल्डोले ‘द बेष्ट’ खेलाडीको उपाधि जित्दा रियलकैजिनेदिन जिदानले उत्कृष्ट प्रशिक्षकको उपाधि जितेका थिए । उत्कृष्ट गोलले पाउने पुस्कास अवार्ड सहित उत्कृष्ट गोलकिपर र फिफा फ्यान अवार्डको सुची भने फिफाले सेप्टेम्बरमै सार्वजनिक गर्ने छ ।

फिफा विश्वकप २०१८ जारी रहंदा उत्कृष्ट खेलाडीको उपाधिमा विश्वकपको प्रदर्शनले पनि अवश्य महत्त्वपूर्ण प्रभाव पार्ने छ ।