म्याड्रिड (एजेन्सी) – रियल म्याड्रिड तथा पोर्चुगलका स्टार खेलाडी क्रिस्टियानो रोनाल्डो इटालियन क्लब युभेन्टस जाने खबरले अहिले फुटबल बजारमा व्याप्त रहेको छ ।

मंगलबार इटाली तथा स्पेनिस स्पोर्ट्स पत्रिकामा सो खबर हेडलाइनकै रुपमा पनि आएको हो । इएसपिएनका अनुसार युभेन्टसले रियलसामु प्रस्ताव पनि राखिसकेको छ  । तर रोनाल्डो आफैले भने आधिकारिक रुपमा सो निर्णय लिइसकेका छैनन् । केही पत्रिकाहरुले भने रोनाल्डोले प्रस्ताव स्विकार गरिसकेको बताए तर सो खबर गलत भएको इएसपिएनले जनाएको छ ।

स्पेनिस पत्रिका मार्साले रियल म्याड्रिड १०० मिलियन युरोमा रोनाल्डोलाई बेच्न तयार भएको छापे पनि केही छिनमा सो खबरलाई सम्पादन गरेको थियो । युभेन्टसलाई टुटोस्पोर्ट्सले ट्विटरमार्फत खबरको सत्यता सोध्दा क्लबले केही भने बोलेको छैन ।

१ सय मिलियनमा रियल म्याड्रिड नमाने १ सय २० मिलियन युरो खर्चिन युभेन्टस तयार रहेको जनाइएको छ । रियल म्याड्रिडले सो प्रस्ताव अहिले सोच्दै गरेको विभिन्न श्रोतहरुले जनाएका छन् ।

रोनाल्डो युभेन्टसमा सरुवा भए ३० मिलियन युरो वार्षिक कमाउंदै उनी विश्व खेलकुदकै सबैभन्दा बढी कमाउने खेलाडी बन्नेछन् । युभेन्टसले अघिल्लो साता रोनाल्डोको एजेन्टलाई पनि भेटेका थिए ।

च्याम्पियन्स लिगको उपाधि जितेपछि रोनाल्डो आफू रियल म्याड्रिडमा रहनेमा अनिश्चितता प्रकट गरेका थिए । जुनमा इएसपिएनले रोनाल्डोले रियल छाडे इंग्ल्यान्ड, स्पेन वा इटालीमा सरुवा हुनु उनी इच्छुक रहेका बताएको थियो ।

रोनाल्डो भर्खरै विश्वकपबाट पोर्चुगलसंग बाहिरिएका हुन् । ४ खेलमा रोनाल्डो ४ गोल गर्न सफल भएका हुन् ।