मस्को (एजेन्सी)– नेयमारमाथि हुने फाउलले आफुलाई आश्चार्यमा नपारेको ब्राजिलका सेन्टर ब्याक थिएगो सिल्भाले बताएका छन् । बार्सिलोनाका पूर्व स्टारलाई रोक्न सहज नहुने भएकाले फाउल गरिने उनको भनाई छ ।

 

चोटका कारण लामो समय मैदान बाहिर रहेका नेयमार विश्व कपको केहि दिन अघि मात्र मैदान फर्केका थिए । त्यसयता मेक्सिकोलाई २–० ले हराउँदा नेयमार आफ्नो लयमा देखिएको विश्वास गरिएको छ । पेरिस सेन्ट जर्मेनका स्टार खेलका दौरान मेक्सिकन खेलाडीबाट पटक पटक फाउलको शिकार भएका थिए । तर, सिल्भा नेयमारका लागि गरिएको फाउल कुनै नयाँ विषय नभएको मान्छन् ।

‘यो सबै सामान्य हो । किनकी नेयमार विशेष क्षमता भएका खेलाडी हुन्, जसले उनलाई रोक्न खोज्छन् फाउल हुने सम्भावना रहन्छ ,’ उनले थपे,’ किनकी नेयमारलाई रोक्नु सधै चुनौतिपूर्ण हुनेछ । फाउल नगरि उनीबाट बल लिन सहज छैन । सिल्भाले मेक्सिकोसँगको खेल कठिन भएको पनि स्वीकारेका छन् । ‘

उनले बेल्जियमसँग हुने क्वार्टरफाइनल पनि कठिन हुने अनुमान गरेका छन् ।’ बेल्जियम प्राविधिक र शारीरिक रुपमा पनि निकै बलियो टोली हो । बेल्जियम अन्तिम १६ मा जितको हकदार थियो,’ उनले भने, ‘मलाई लाग्छ ब्राजिल प्रतियोगिताको दाबेदार हो । तर त्यसो भन्नु पर्याप्त होइन । यदि हामी उपाधि चाहन्छौं भने हामीले अझै मेहनत गर्दै उच्च प्रदर्शन गर्न जरुरी हुन्छ ।’

सिल्भाले मेहनत र आराम दुवै आवश्यक रहेको उल्लेख गर्दै शुक्रबार बेल्जियमसँग हुने खेल अझै कठिन रहेको बताएका छन् । ब्राजिलले मेक्सिको माथि सहज जित हात पारेको थियो भने बेल्जियमले जापानसँग २–० ले पछि परेको खेल उल्टाउँदै ३–२ को जित दर्ता गरेको थियो ।