ब्युनर्स आयर्स (एजेन्सी)– अर्जेन्टिनाका महान खेलाडी डिएगो म्यारोडोनाले क्रिस्टियानो रोनाल्डोले रियल म्याड्रिड छाड्ने चर्चामा कुनै टिप्पणी गर्न नचाहेको बताएका छन् । उनले भने, ‘रोनाल्डोले नै यो विषयमा निर्णय गर्ने छन्, म यो विषयमा सहभागी हुन चाहन्न ।’

रियलले लगातार तेस्रो पटक च्याम्पियन्स लिग उपाधि जितेसँगै ३३ वर्षे सुपर स्टारले आउने सिजन क्लब छोड्ने चर्चा सुरु भएको थियो । उनी पूर्व क्लब म्यानचेस्टर युनाइटेड वा पेरिस सेन्ट जर्मेन (पिएसजी) जान सक्ने चर्चा चलेको छ ।

रोनाल्डोको नेतृत्वमा पोर्चुगल रसियामा जारी विश्व कपमा प्रि क्वार्टरफाइनलमा पुगेको थियो । अन्तिम १६ को खेलमा रोनाल्डोको टोली उरुग्वेसँग २–१ ले पराजित भएको थियो । विश्व कपमा रोनाल्डोले ४ गोल गरेका थिए । विश्व कपपछि अब फेरि रोनाल्डो क्लब फुटबलमा केन्द्रित हुने विश्वास गरिएको छ ।

यद्दपी उनको भविष्यका बारेमा बोल्न म्यारोडोनाले अस्वीकार गरे । ‘रियलमा बस्ने वा छाड्ने त्यसको निर्णय उनले नै गर्नेछन् । म त्यसमा पर्न चाहन्न,’ उनले भने, ‘रोनाल्डोलाई सल्लाह दिने उनका नजिकका मान्छे छन्, सहि सल्लाह उनीहरुले नै दिनेछन् ।’

पाँच पटकका बालोन डी ओर विजेता रोनाल्डो सन् २००९ मा युनाइटेडबाट रियल पुगेका थिए । उनको सहभागितमा रियलले ४ वटा च्याम्पिन्स लिग, ला लिगा र कोपा डेल रे समान २ पटक जितेको थियो ।