काठमाडौं (हाम्रो खेलकुद) – मोफसलको हाइलाइफ मोरङ फुटबल क्लब र राजधानीको ब्रिगेड ब्वाइज क्लब राजधानीमा जारी तेस्रो ललित स्मृति यु–१८ फुटबल प्रतियोगिताको सेमिफाइनलमा प्रवेश गरेका छन् ।

सातदोबाटोस्थित एन्फा कम्प्लेक्सको खेल मैदानमा आइतबार भएको पहिलो क्वार्टर फाइनलमा मोरङ फुटबल क्लबले च्यासल युथ क्लबमाथि २–१ को जित निकाल्दै अन्तिम चारमा पुग्न सफल भएको हो । मोरङको जितमा आशिष चौधरीले दुवै गोल गरे । च्यासलका रोसन भुजेलले एक गोल फर्काए ।

प्रतिस्पर्धात्मक बनेको खेलमा तीन गोल दोस्रो हाफमा सम्भव भएको हो । आशिष चौधरीले ७३ औं मिनेटमा गोल गर्दै मोरङलाई अग्रता दिलाएका थिए । उनैले ८१ औं मिनेटमा गोल गर्दै अग्रता दोब्बर पारे । ८९ औं मिनेटमा च्यासलका रोशन भुजेलले गोल गर्दै खेलमा फर्कने प्रयास गरेपनि त्यो निकै ढिला भैसकेको थियो ।

आइतबारै भएको अर्काे खेलमा ब्रिगेड ब्वाइजले मोफसलको रमपम झापा–११ माथि २–१ को जित निकाल्दै अन्तिम चारमा स्थान बनाउन सफल भयो । ब्रिगेडको जितमा रजत तिवारीले दुइृ गोल गरे । झापाका डोजाङ लिङ्देनले एक गोल गरे । ब्रिगेड ब्वाइजले १ गोलले पछि परेको स्थिति उल्ट्याएर झापामाथि जित निकालेको हो ।

डोजाङ लिङ्देनले खेलको सातौ मिनेटमा गोल गर्दै झापालाई अग्रता दिलाएका थिए । १४ औं मिनेटमा रजतले बराबरी गोल फर्काएपछि पहिलो हाफ १–१ गोलको बराबरीमा सकिएके थियो । ६८ औं मिनेटमा रजतले गोल गर्दै टिमलाई अन्तिम चारमा पुर्‍याए ।

प्रतियोगिता अन्र्तगत सोमबार त्रिभुवन आर्मी क्लब र हिमालयन शेर्पाबीच दिनको १ बजे पहिलो क्वार्टरफाइनल खेल हुनेछ । अपरान्ह ४ बजे फ्रेन्डस क्लब र लुम्बिनी फुटबल क्लबले प्रतिस्पर्धा गर्नेछ ।