मस्को (एजेन्सी)– इङ्ल्यान्डका कप्तान ह्यारी केन विश्वका उत्कृष्ट पाँच खेलाडी मध्ये एक रहेको लिभरपुलका पूर्व मिडफिल्डर जेमी रेडन्यापले बताएका छन् । विश्व कपको केहि दिन अघि मात्र प्रशिक्षक गेराथ साउथगेटले केनलाई कप्तान नियुक्त गरेका थिए ।

पानामाविरुद्ध ह्याट्रिक गरेका उनले जारी विश्व कपमा ५ गोल गरिसकेका छन् । अर्जेन्टिनाका लियोनल मेस्सी , पोर्चुगलका क्रिस्टियानो रोनाल्डोलाई पनि छायाँमा पार्दै केन यो विश्व कपको चर्चामा रहेका छन् । इङ्ल्यान्डका पूर्व मिडफिल्डर समेत रेका रेडन्यापले केनको नेतृत्वमा टोलीले विश्व कप नकआउट चरणमा पनि सफलतालाई निरन्तरता दिने विश्वास व्यक्र गरेका छन् ।

‘उनी हाम्रा मेस्सी र रोनाल्डो हुन् । उनी जादुगर हुन् । उनी स्कोरका लागि प्रयास गर्छन् र त्यसले फरक पारेको छ, ‘उनले भने,’ उनी नेतृत्वका लागि उदाहरण हुन् । अहिले उनको बारेमा जहाँ पनि चर्चा छ । ‘

रेडन्यापले केन अर्को तहको खेलाडी भएको बताए । ‘व्यक्तिका रुपमा मात्र होइन एउटा खेलाडीका रुपमा पनि उनी अहिले विश्वका एक उत्कृष्ट खेलाडी हुन,’ उनले थपे, ‘उनी शीर्ष ५ मा छन् । आउने दिनमा उनी अझै माथि जानेछन् ।’

टोटेनह्यामका २४ वर्षे स्टार केनले इङ्ल्यान्डका लागि २६ खेलमा १८ गोल गरिसकेका छन् । उनको उच्च प्रदर्शन अहिले पनि उत्तिकै छ र नकआउटमा पनि त्यस्तै रहने अपेक्षा गरिएको छ । अन्तिम १६ मा मंगलबार इङ्ल्यान्डले कोलम्बियाको सामना गर्नेछ ।