निज्नी (एजेन्सी) – समूह चरणमा उत्कृष्ट प्रदर्शन गरेको क्रोएसियाले आइतबार राति क्वार्टरफाइनल प्रवेशका लागि डेनमार्कको सामना गर्देछ । खेल निज्नी नोभोगोरोडस्थित एरिनामा राति ११ः४५ बजेपछि शुरु हुनेछ ।

क्रोएसिया समूह ‘डी’ को विजेता हो भने डेनमार्क समूह ‘सी’ को उपविजेतको रुपमा अन्तिम १६ मा प्रवेश गरेको टिम हो । समूह चरणमा शतप्रतिशत जित निकालेर उच्च मनोबलमा रहेको क्रोएसिया डेनमार्कलाई पनि पराजित गर्दै क्वार्टरफाइनलमा प्रवेश गर्ने लक्ष्यमा हुनेछ । समूह चरणको खेलमा अर्जेन्टिनाजस्तो बलियो टोलीलाई ३–० ले पराजित गरेर हौसिएको क्रोएसिया डेनमार्कविरुद्धको खेलमा पनि सोही प्रदर्शनलाई निरन्तरता दिने लक्ष्यमा हुनेछ ।

क्रोएसियासँग विश्वस्तरका लुका मोड्रिक, इभान राकिटिक माटियो कोभासिकजस्ता खेलाडीहरुको साथ छ । क्रोएसियाका प्रशिक्षक ज्लाट्को डालिकले डेनमार्कविरुद्धको खेल प्रतिस्पर्धात्मक र रोमाञ्चक हुने बताएका छन् ।

‘क्रोएसियाको अहिलेको टिम गोल्डेन टिम हो । उसले अर्जेन्टिनाजस्तो बलियो टिममाथि ३–० को बलियो जित निकालेको छ । यो नै क्रोएसियाको गोल्डेन टिमको उदाहारण हो ।’ प्रशिक्षक डालिकले भने, ‘मेरो टिमले डेनमार्कलाई पनि पराजित गर्ने क्षमता राख्दछ । आशा छ आज सकरात्मक नतिजा आउनेछ ।’

१९९८ को विश्वकपमा तेस्रो स्थान हात पार्नु नै क्रोएसियाको विश्वकपमा सबैभन्दा सफल नतिजा हो । त्यसपछिका चार विश्वकपमध्ये तीन विश्वकपमा क्रोएसियाले समूह चरण पार गर्न सकेको थिएन । क्रोएसियाका खेलाडी माटियो कोभासिकले डेनमार्कका क्रिस्टियन इरिक्सन खतरनाक खेलाडी रहेको बताउदै उनलाई रोक्न सके अघिल्लो चरणमा पुग्न सकिने बताए ।

‘उनी हाम्रो लागि पनि खतरनाक खेलाडी हो । आफु कति अब्बल भन्ने उनले इंग्लिस क्लब टोटनह्याममा प्रमाणित गरिसकेका छन् ।’ प्रि म्याच कन्फ्रेसमा कोभासिकले भने, ‘हामी उनीविरुद्धको खेलमा सचेत भएर खेल्नुपर्दछ । जस्तो कि मेस्सीको अर्जेन्टिनाविरुद्धको जस्तै खेल खेल्नुपर्ने हुन्छ । हामी त्यही खेललाई दोहोराउन सक्दो प्रयास गर्नेछौं ।’

यता डेनमार्कले पनि समूह चरणमा उत्कृष्ट प्रदर्शन गरेको थियो । उपाधिको दावेदार मानिएको फ्रान्सलाई बराबरीमा रोकेर अघि बढेको डेनमार्कले क्रोएसियालाई पराजित गरेर अघि बढ्ने लक्ष्य बनाएको छ । डेनमार्कको यो लक्ष्यमा क्रिस्टियन इरिक्सन हतियार हुनेछ । नाम चलेका खेलाडी टिममा नरहेपनि डेनमार्कले संगठित प्रदर्शन गरिरहेको छ । १९९८ को विश्वकपमा डेनमार्क क्वार्टरफाइनलसम्म पुग्न सफल भएको थियो । त्यही प्रदर्शनलाई दोहोराउने योजनामा डेनमार्क रहनेछ ।

क्रोएसिया र डेनमार्क अहिलेसम्म पाँचपटक आमने समाने भएका छन् । दुवै टोलीले समान दुई जित, दुई बराबर र एक हारको नतिजा बेहोरेका छन् ।