काजान (एजेन्सी)– संघर्षपूर्ण यात्रा तय गरेको अर्जेन्टिनाले विश्व कपको प्रिक्वार्टरफाइनलमा आज साँझ सन् १९९८ को विजेता फ्रान्सको सामना गर्दैछ । खेल नेपाली समय अनुसार साझ ७ः४५ बजे सुरु हुनेछ ।

समूह चरणको अन्तिम खेल सम्म पनि अर्जेन्टिना अघि बढ्नेमा शंका थियो । आइसल्यान्डसँग १–१ को बराबरी त्यसपछि क्रोएसियासँग ३–० को हारपछि अर्जेन्टिना अघि बढ्न निकै कठिन थियो । त्यस्तो अवस्थाबाट अघि बढेको टोलीले नाइजेरियालाई २–१ ले हराउँदै समूह उपविजेता बन्न सफल भएको थियो ।

नाइजेरियाको खेल अघि प्रशिक्षक जर्ज साम्पोली बर्खास्त हुन सक्ने खबर पनि सार्वजनिक भएको थियो । तर साम्पोली अब फ्रान्सविरुद्धको खेलका लागि टोली तयार रहेको बताउँछन् । ‘हामी त्यस्तो टोलीसँग खेल्न गइरहेका छौं जोसँग उत्कृष्ट खेलाडी छन्,’ उनले भने, ‘उनीहरु दाबेदार मध्येका एक हुन् । हामीले एकरुपताको प्रदर्शन गर्न आवश्यक छ । खेल सहज पक्कै हुने छैन । ‘

नाइजेरियासँगको जितपछि साम्पोली डे«सिङ रुममा चुपचाप बसिरहेका थिए । खेलाडी भने खुसियाली साटी रहेका थिए । त्यस्तोमा लियोन मेस्सीले गएर उनलाई अंगालो हालेका थिए । ‘मेस्सीको व्यवहारमा मलाई गर्व छ । उनलाई मेरो मेहनत सबै थाहा छ,’ उनले भने, ‘हामीले आफ्नो सपना एकअर्कासँग साटेका छौं । अर्जेन्टिनाका लागि रसिया यात्रा कति महत्वपूर्ण छ हामीलाई थाहा छ । ‘

धेरैलाई अर्जेन्टिना मेस्सीकै भरमा रहेको भन्ने विश्वास छ । तर फ्रान्सेली गोलकिपर हुगो लोरिस भने त्यो तर्कसँग सहमत छैनन् । ‘ मेस्सीसँग बढी अपेक्षा गरिएको छ । त्यो स्वभाविक पनि हो । तर पनि टोलीमा थुप्रै त्यस्ता खेलाडी छन् , जसले खेलमा प्रभाव पार्न सक्छन्,’ उनले भने, ‘उनीहरु केहि कठिन अवस्थाबाट गुज्रिए । यद्दपी उनीहरु स्तरीय टोली हुन् । मलाई पुरा विश्वास छ उनीहरु अझै बलियो रुपमा प्रस्तुत हुनेछन् । उनीहरुले यो अघि पनि विश्व कप जितिसकेका छन् ।’

लोरिसले अर्जेन्टिनासँगको खेललाई ठूलो खेलको संज्ञा दिदै भने, यो खेल कठिन पनि छ । हामी खेल जित्नका लागि हर सम्भव र आफ्नो क्षमता अनुसारको प्रदर्शन गर्नेछौं ।