मस्को (एजेन्सी)– ला लिगामा बार्सिलोना र रियल म्याड्रिड खेल्दा मात्र क्रिस्टियानो रोनाल्डो प्रतिद्वन्द्वीका रुपमा लिएको लुइस स्वारेजले बताएका छन् । रोनाल्डोको पोर्चुगलले स्वारेज सम्मिलित उरुग्वेसँग शनिबार राती विश्व कपको प्रि क्वार्टरफाइनलमा प्रतिस्पर्धा गर्दैछ । बार्सिलोनाका स्वारेजले रियलका फरवार्ड रोनाल्डोसँग व्यक्तिगत लडाई केहि नरहेको पनि प्रष्ट पारेका छन् ।

‘रोनाल्डोसँगको प्रतिस्पर्धा भनेको क्लबमा मात्र सिमित छ । त्यो फरक विषय हो,’ स्वारेजले भने,’ यो विश्व कप हो । यहाँ सबैले आफ्नो टोलीलाई जिताउने प्रयास गर्नेछन् । यसलाई सबैले स्वीकार गर्नुपर्दछ । सबैले नकआउट चरण जित्नका लागि सक्दो प्रयास गर्नेछौं ।’

विश्व कप समूह चरणको सुरुवाती दुई खेलमा रोनाल्डोले ४ गोल गरेका थिए । उरुग्वे त्यस्तो एक मात्र टोली हो जसले समूह चरणमा एउटा पनि गोल खाएन । समूह चरणमा उरुग्वेले रसिया, साउदी अरेबिया र इजिप्टसँग प्रतिस्पर्धा गरेको थियो ।

उरुग्वेका प्रशिक्षक ओस्कार टाबरेजले पनि रोनाल्डोको खुलेर प्रशंसा गरेका छन् । यद्दपी उनले पोर्चुगलले उच्च प्रदर्शन गर्नुमा सामुहिक प्रदर्शनकै कारण सम्भव भएको बताएका छन् ।

‘रोनाल्डो विश्वका उत्कृष्ट फरवार्ड मध्ये एक हुन् । उनी क्षमतावान खेलाडी हुन् । उनी टोलीका नेतृत्वकर्ता हुन्,’ प्रशिक्षक टाबरेजले भने, ‘एउटा खेलाडीलेमात्र केहि गर्ने होइन । तर उनी हुनु टोलीका लागि विशेष फाइदा हो ।’