काठमाडौं (हाम्रो खेलकुद) – ब्रिगेड ब्वाइज क्लब राजधानीमा जारी तेस्रो ललित स्मृति यु–१८ फुटबल प्रतियोगिताको क्वार्टरफाइनल नजिक पुगेको छ । एन्फा कम्प्लेक्सको एस्ट्रो टर्फमा बिहिबार भएको खेलमा विभागीय नेपाल पुलिस क्लबमाथि ५–१ को फराकिलो जित निकाल्दै ब्रिगेड ब्वाइज क्वार्टरफाइनल नजिक पुगेको हो । पुलिस भने प्रतियोगिताबाट बाहिरिएको छ ।

ब्रिगेडको तीन खेलबाट ५ अंक पुगेको छ । यो समूहमा जावलाखेल र मोरङ समान दुई खेलबाट ४ अंक छ । दुवैले एक खेल खेल्न बाँकी छ । मोरङ र जावलाखेलबीचको खेल कुनै एक टिमले जितेमा ब्रिगेड ब्वाइज समूह उपविजेताको रुपमा क्वार्टरफाइनलमा प्रवेश गर्नेछ । बराबरी खेलेको अवस्थामा भने गोलअन्तरमा अर्काे टोलीको छिनोफानो हुनेछ । ब्रिगेडका रितिक कुमार खड्काले ह्याट्रिकसहित चार गोल गरे । पुलिसका प्रदिप बानियाले सान्त्वना गोल फर्काए ।

एकपक्षीय बनेको खेलमा ब्रिगेडले खेलको २४ औं मिनेटमा कप्तान जय गुरुङको गोलबाट अग्रता बनाएको थियो । २८ औं मिनेटमा रितिकले गोल गर्दै ब्रिगेडको अग्रता दोब्बर पारे । ३४ औं मिनेटमा पुलिसका प्रदिप खड्काले गोल गर्दै पुलिसलाई खेलमा फर्काउने प्रयास गरे । ४१ औं मिनेटमा रितिकले गोल गरेपछि ब्रिगेडले पहिलो हाफमा ३–१ को आरामदायी अग्रता बनायो ।

दोस्रो हाफमा थप दुई गोल गर्दै ब्रिगेडलाई फराकिलो जित दिलाए । रितिकले ५५ औं मिनेटमा गोल गर्दै ह्याट्रिक पुरा गरे । ६२ औं मिनेटमा रितिकले टिमका लागि पाँचौ तथा व्यक्तिगत चौथो गोल गर्न सफल भए । त्यसपछि थप गोल नहुदा ब्रिगेडले फराकिलो जित निकाल्यो । ब्रिगेडका रितिक खेलको म्यान अफ दी म्याच घोषित भएका थिए ।