काजान (एजेन्सी)– लगातार तेस्रो पटक साविक विजेता टोली विश्व कपको समूह चरणबाट बाहिरएको छ । साविक विजेता जर्मनी बुधबार रसियामा जारी विश्व कपबाट बाहिरिएकोछ । चार वर्षअघि ब्राजिलमा अर्जेन्टिनालाई फाइनलमा १–० ले हराउँदै जर्मनीले विश्व कप उपाधि उचालेको थियो ।

यसपटक समूह चरणको पहिलो खेलमा मक्सिकोसँग १–० ले पराजित जर्मनी अन्तिम खेलमा दक्षिण कोरियासँग बुधबार २–० ले स्तब्ध भएको थियो । जर्मनीले दोस्रो खेलमा भने स्विडेनविरुद्ध २–१ को सघर्षपूर्ण जित हासिल गरेको थियो ।

जोचिम लोको टोली समूह एफमा पुछारमा रहँदै यसपटकको विश्व कपको समूह चरणको अन्त्य गरेको छ । समूहबाट आश्चार्यजनक रुपमा स्विडेन विजेता र मेक्सिको उपविजेताका रुपमा अन्तिम १६ मा पुगेका छन् । स्विडेनले बुधबार नै मेक्सिकोलाई ३–० ले हराएको थियो । समूहमा स्विडेन र मेक्सिकोले समान ६ अंक जोडे । विश्व कपबाट बाहिरिएका दक्षिण कोरिया र जर्मनीको समान ३ अंक रह्यो ।

यसअघि इटाली र स्पेन पनि विजेताका रुपमा विश्व कप पुगेर समूह चरणबाटै बाहिरिएका थिए । सन् २००६ विजेता २०१० को विश्व कपमा समूह चरणको पुछारमा रहेको थियो । त्यस्तै २०१० को विजेता स्पेन पनि चार वर्षपछि ब्राजिल पुगेर नकआउट चरण पुग्न सकेन । सन् १९९८ को विजेता फ्रान्स पनि लगत्तैको विश्व कपको समूह चरणबाटै बाहिरिएको थियो ।

यसको अर्थ च्याम्पियन टोलीका लागि उपाधि रक्षा मात्र होइन पहिलो चरणबाट अघि बढ्न नै चुनौतिपूर्ण हुने गरेको छ । पछिल्लो पाँच मध्ये चार विश्व कपको इतिहासले यहि विषयलाई प्रमाणित गरेको छ । पछिल्ला पाँच विश्व कपमध्ये सन् २००२ को विजेता ब्राजिल मात्र चार वर्षपछिको विश्व कपको क्वार्टरफाइनलमा पुगेको थियो ।

सन् १९३८ यताको विश्व कपमा जर्मनीको यो सबैभन्दा कमजोर प्रदर्शन हो । जहाँ टोली पहिलो चरणबाटै घर फर्केको छ । १९३८ यता पहिलो पटक टोली नकआउट चरणमा पुग्न असफल भएको छ । २००२ को उपविजेता जर्मनी २००६ र २०१० को विश्व कपमा तेस्रो भएको थियो ।