काठमाडौं (हाम्रो खेलकुद)– जावलाखेल युथ क्लबले राजधानीमा जारी तेस्रो ललित स्मृति यु–१८ फुटबल प्रतियोगितामा पहिलो जित दर्ता गरेको छ । प्रतियोगिता अन्र्तगत मंगलबार भएको खेलमा जावलाखेलले विभागीय नेपाल पुलिस क्लबमाथि १–० को झिनो जित निकाल्दै प्रतियोगितामा पहिलो जित हासिल गरेको हो ।

जावलाखेलको जितमा निरज चौधरीले पहिलो हाफमा गरेको एकमात्र गोल नै खेलको निर्णायक बन्यो । सातदोबाटोस्थित एन्फा कम्प्लेक्सको खेल मैदानमा मंगलबार भएको प्रतिस्पर्धात्मक खेलको ११ औं मिनेटमा निरजले गोल गर्दै जावलाखेललाई अग्रता दिलाए ।

त्यसपछि दुवै टोलीले गोल गर्ने प्रयास खेर गएपछि जावलाखेलको जितमा पर्याप्त बन्यो । पुलिस पहिलो खेलमा मोरङसँग १–० ले नै पराजित भएको थियो । मंगलबार नै भएको अर्को खेलमा मोफसलको मोरङ फुटबल क्लब र ब्रिगेड ब्वाइजले १–१ गोलको बराबरी खेल्दै अंक बाँडे ।

पहिलो हाफ बराबरीमा सकिएपनि ५५ औं मिनेटमा मोरङले पारस खत्रीको गोलबाट अग्रता बनाएको थियो । तर, मोरङको त्यो अग्रता १ मिनेट पनि टिकेन । ब्रिगेडका अनुप गुरुङले ५६ औं मिनेटमा बराबरी गोल फर्काए ।

त्यसपछि दुवै टोलीले गोल गर्न नक्दा खेल १–१ गोलको बराबरीमा सकियो । बराबरीपछि मोरङको दुई खेलबाट ४ अंक पुगेको छ । अपराजित नै रहेको ब्रिगेड ब्वाइजको दुई खेलबाट दुई अंक नै रहेको छ । पुलिसले भने अंक जोड्न सकेको छैन ।

प्रतियोगिता अन्र्तगत बधबार समूह ‘सी’ का दुई खेल हुदैछ । पहिलो खेलमा सिएमजी क्लब संकटा र झापा–११ ले दिउसो १ः३० बजे प्रतिस्पर्धा गर्नेछ । दोस्रो खेलमा दिउसो ४ बजे च्यासल युथ क्लब र विभागीय नेपाल पुलिस क्लबबीच खेल हुनेछ ।