मस्को (एजेन्सी)– अर्जेन्टिनाको अहिलेको अवस्थाबाट लियोन मेस्सी दिक्दार बनेकोे स्वीकार गर्दै जाभियर मास्केरानोले अर्को खेलमा भने टोली पुरै उच्च मनोबलका साथ उत्रने बताउका छन् । पहिलो खेलमा आइसल्यान्डसँग १–१ को बराबरीमा रोकिएको अर्जेन्टिना अर्को खेलमा क्रोएसियासँग ३–० ले पराजित भएपछि अघिल्लो चरणको यात्रा कठिन बनेको छ ।

आइसल्यान्डविरुद्ध पेनाल्टीमा गोल गर्न बाट चुकेपछि मेस्सीमाथि दुवै खेलमा अत्यन्तै दबाब थियो । अब मंगलबार नाइजेरियाविरुद्ध हुने खेल जित्न सकेको खण्डमा मात्र नकआउट चरणमा पुग्ने अर्जेन्टिनाको सम्भावना बाँकी रहन्छ । अर्जेन्टिना अघि बढ्नका लागि नाइजेरिया हारेर मात्र हुने छैन, क्रोएसियाले पनि आइसल्यान्डलाई हराउनुपर्ने हुन सक्दछ ।

मास्केरानोले मेस्सी नाइजेरियाविरुद्ध खेल्न आतुर रहेको र समूह चरणबाट टोलीलाई अघि बढाउन प्रतिबद्ध रहेको बताएका छन् । ‘लियो ठिक छन् , उनले भने, सामूहिक रुपमा हामीले चाहे जस्तो गर्न सकेनौं त्यसले हामी आफै दिक्दार छौं । उनी पनि मान्छे हुन् । उनलाई पनि दिक्का लागेको छ । तर परिस्थितिलाई बदल्नका लागि उनी आतुर छन्। अहिले दुई खेलमा हाम्रो जुन छवि बनेको छ उनी विश्वलाई फरक रुपमा प्रस्तुत भएर देखाउन चाहन्छन् ।’

प्रशिक्षक जर्ज साम्पोलीसँग खेलाडी रिसाएको र सिनियर खेलाडीले नै नाइजेरियाविरुद्धको खेलका लागि पहिलो रोजाई टोली तयार पार्ने सम्भावना रहेको बताइएको छ । तर, मास्केरानोले ती सबै विषयलाई अस्वीकार गरेका छन् । खेलाडी र प्रशिक्षकबीच पहिला जस्तै सम्बन्ध रहेको बताएका छन् ।

‘हाम्रो सम्बन्ध साम्पोलीसँग सामान्य छ । यदि कहि असमझारी भएमा हामी आवाज उठाउने छौं, हामी ढोग गर्दैनौं,’ उनले भने, ‘असहमतिले टोलीलाई कमजोर बनाउछ । त्यसैले हामी एकजुट हुनुपर्दछ । हामी २३ जनाको टोली छ ।’ उनले सोचे जस्तो खेल्न नसकेको जनाउँदै त्यसको जिम्मेवारी लिनुपर्ने बताएका छन् ।