सिएमजी क्लब संकटा विजयी, झापालाई सफलता

काठमाडौं (हाम्रो खेलकुद)– सिएमजी क्लब संकटाले राजधानीमा जारी तेस्रो संस्करणको ललित स्मृति यु–१८ फुटबल प्रतियोगितामा विजयी सुरुवात गरेको छ । सातदोबाटोस्थित एन्फा कम्प्लेक्सको एस्ट्रो टर्फमा भएको सोमबार भएको समूह ‘सी’ खेलमा संकटाले विभागीय नेपाल एपिएफ क्लबलाई २–१ ले पराजित गर्दै प्रतियोगितामा सुखद सुरुवात गरेको हो ।

संकटाको जितमा उमेश सुरा र अभिषेक श्रेष्ठले गोल गरे । पराजित टिमका लागि भोजराज मगरले एक गोल फर्काए । प्रतिस्पर्धात्मक बनेको खेलमा अग्रता भने एपिएफले लिएको थियो । एपिएफका भोजराजले ५५ औं मिनेटमा गोल गर्दै टिमलाई अग्रता दिलाएका थिए । तर, एपिएफको त्यो अग्रता तीन मिनेट पनि टिकेन ।

संकटाका उमेशले ५८ औं मिनेटमा बराबरी गोल फर्काए । बराबरीतर्फ धकेलिएको खेलको थप गरिएको समयमा अभिषेक श्रेष्ठले गोल गर्दै संकटालाई महत्वपूर्ण ३ अंक दिलाए । आजै भएको यस समूहको अर्को खेलमा झापाले च्यासमाथि ३–१ को जित निकालेको थियो ।

प्रतियोगिता अन्र्तगत मंगलबार समूह ‘बी’ का दुई खेल हुदैछ । पहिलो खेलमा ब्रिगेड ब्वाइज र मोरङले दिउसो १ः३० बजे प्रतिस्पर्धा गर्नेछ । दोस्रो खेलमा दिउसो ४ बजे जावलाखेल र नेपाल पुलिस क्लबबीच खेल हुनेछ ।