मस्को (एजेन्सी)– इङ्ल्यान्डका कप्तान ह्यारी केनले बेल्जियमविरुद्ध हुने समूह चरणको अन्तिम खेल्दै टोलीलाई समूह विजेता बनाउन इच्छा रहेको बताएका छन् । समूह चरणका २ खेलमा ५ गोल गरेका केन जारी विश्व कपको उच्चकर्ता हुन् । पहिलो खेलमा २ गोल गरेका केनले आइतबार पानामाविरुद्ध ह्याट्रिक गरेका थिए ।

उनले बेल्जियमका रोमेलु लुकाकु र पोर्चुगलका क्रिस्टियानो रोनाल्डोलाई पछि पारेका छन् । लुकाकु र रोनाल्डोको समान ४ गोल गरे । कतिपय सञ्चारमाध्यमले भने ट्युनिसियाविरुद्धको खेलमा चोट लागेका कारण इङ्ल्यान्डसँगको खेलमा लुकाकुलाई आराम दिने सम्भावना छ ।

तर केन भने आराम नभई समूह चरणको अन्तिम खेलमा पनि आबद्ध हुन चाहन्छन् । ‘ जुन लयमा छु म त्यसलाई निरन्तरता दिन चाहन्छु । तर, जे निर्णय हुन्छ मैले त्यसको सम्मान गर्नुपर्दछ,’ केनले भने,‘ को खेल्ने भन्ने उनको निर्णय हो । तर, म निश्चय नै खेल्न चाहन्छु ।’

टोलीले खेल जित्नु सबैभन्दा महत्वपूण भएको उल्लेख गर्दै थपे,‘ त्यसमा मेरो गोल सहयोगी हुन्छ भने त्यो पक्कै राम्रो हो । हामीले लामो यात्रा तय गर्नुछ । हाम्रो टोलीमा मेरो पछाडि थुप्रै उत्कृष्ट खेलाडी छन् । आशा गरौं मैले बिहीबारको खेलमा निरन्तरता दिनेछु ।’

केनले इङ्ल्यान्डले समूहको विजेता बन्नु पर्नेमा जोड दिएका छन् । ‘हामीले शीर्षस्थान हासिल गर्नु महत्वपूर्ण हुनेछ ,’ उनले भने,‘ पहेलो कार्ड वा अरु केहि कारणले अहिले हामी अगाडि छौं । तर, हामी खेल जित्ने प्रयासमा हुनेछौं, जसले अघिल्ला चरणहरुमा त्यो लयले साथ दिनेछ ।’