मस्को (एजेन्सी)– फ्रान्सलाई विश्व कप दिलाउन प्रतिबद्ध रहेका मिडफिल्डर पाउल पोग्बाले यो उनको अन्तिम विश्व कप हुन सक्ने बताएका छन् । फ्रान्सेली टोलीमा पर्नका लागि तीब्र प्रतिस्पर्धा हुने तर्फ संकेत गर्दै उनले भने, ‘अन्य खेलाडी म भन्दा उत्कृष्ट देखिए भने भविष्यमा म टोलीमा नपर्न सक्छु ।’

विश्वका उत्कृष्ट मिडफिल्डर मध्येका एक म्यानचेस्टर युनाइटेडका पोग्बाले रसिया विश्व कपमा टोलीका लागि प्रभावशाली प्रदर्शन गरिरहेका छन् । समूह चरणको अस्ट्रेलियाविरुद्धको पहिलो खेलमा २–१ जित उनकै कारण सम्भव भएको थियो ।

विश्व कपलाई उत्साहपूर्वक लिइरहेका पोग्बाले यसलाई आफ्नो सम्भावित अन्तिम विश्व कप मानेछन् । ‘सम्भवत यो अन्तिम विश्व कप हुन सक्दछ । म यथार्थमा विश्वास गर्छु । भविष्यमा हामी पर्छौ पर्दैनौं भन्न सकिन्न,’ आइतबार पत्रकार सम्मेलनमा उनले भने , ‘सायद म भन्दा उत्कृष्ट खेलाडी आउन सक्छन् । मलाई लाग्छ मैले धेरै प्रतियोगिता खेले । कतिपयले एकपटक विश्वकप खेल्ने सपना देखेका हुन्छन् । मैले त दुई पटक खेलिसके ।’

विश्व कपको समूह सीमा रहेको फ्रान्सले समूह विजेताका लागि डेनमार्कसँग बराबरी पनि पर्याप्त रहनेछ । समूह सीको विजेता बनेमा प्रान्सले समूह डीको उपविजेतासँग अन्तिम १६ मा प्रतिस्पर्धा गर्नेछ ।