पोल्यान्डविरुद्ध कोलम्बियाको अग्रता, मिनाको गोल

काजान (एजेन्सी)– विश्व कपको समूह एच अन्तर्गतको खेलमा पोल्यान्डविरुद्धको खेलको पहिलो हाफमा कोलम्बियाले अग्रता लिएको छ । पहिलो हाफको अन्त्य तिर गोल गर्दै कोलम्बियाले १–० ले अगाडि लागेको छ । ४० औं मिनेटमा यरि मिनाको गोलमा कोलम्यिाले अग्रता लिएको हो ।

पहिलो रोजाइमा परेका हामेस रोड्रिग्वेजको क्रसमा मिनाले नजिकबाट हेड गोल गर्दै अग्रता दिलाएका थिए । यो अग्रतालाई जोगाउन सकेको खण्डमा कोलम्बियाको प्रि क्वार्टरफाइनल पुग्ने सम्भावना जीवित रहनेछ ।

खेलमा फर्कन नसेकेको खण्डमा पोल्यान्ड भने विश्व कपबाट बाहिरिनेछ । पहिलो खेल गमाइसकेका कोलम्बिया र पोल्यान्ड दुवैका लागि यो खेल महत्वपूर्ण छ । यसअघि समूहको अर्को खेलमा जापान र सेनेगलले २–२ बराबरी खेलेका थिए ।

समान ४ अंक जोडेका यी दुई टोली मध्ये जापान शीर्ष स्थान र सेनेगल दोस्रो स्थानमा छ । पहिलो खेलमा जापानले कोलम्बियालाई र सेनेगलले पोल्यान्डलाई समान २–१ ले हराएको थियो ।