मस्को (एजेन्सी)– खेल जीवनमा विश्व कप जित्नै पर्ने सबैभन्दा बढी दबाब झल्ने खेलाडी मध्ये अर्जेन्टिनाका सुपर स्टार लियोन मेस्सी हुन् । क्लब जीवनमा सबै खाले उपलब्धि हासिल गरिसकेका मेस्सीले देशका लागि अहिले सम्म महत्वपूर्ण उपाधि जित्न नसकेको भन्दै आलोचना हुने गरेको छ ।

दिक्दार पार्ने गरि विश्व कपका बारेमा मेस्सीलाई सोध्ने गरिएपनि उनले देशका लागि फुटबलको सबै भन्दा प्रतिष्ठित उपाधि विश्व कप नजितेसम्म बुट नथन्याउने दाबी गरेका छन् । आइबार ३१ औं वर्षमा प्रवेश गरेका मेस्सीले देशका लागि विश्व कप जित्ने सपना अझै नत्यागेको बताएका छन् ।

‘अर्जेन्टिनाका लागि विश्व कप विशेष छ, सँगै मेरा लागि पनि, ‘ उनले भने, ‘विश्व कप उपाधि उठाएको सपना सधै देख्ने गरेको छु । त्यसले भावुक पनि बनाउछ । त्यो क्षण सम्झेर मेरो कपाल ठाडो हुन्छ । यसले लाखौं अर्जेन्टिनीलाई खुसी बनाउनेछ ।’

यी सबै पृष्ठभूमि सम्झेर विश्व कप जित्ने सपना त्याग्न नसक्ने बताएका छन् । ‘मैले सबै महत्वपूर्ण उपाधि जितेको छु । म यसको सुखद अन्त्य चाहन्छु,’ उनले भनेका छन्, ‘देशलाई विश्व विजेता नबनाई सक्रिय खेल जीवनबाट सन्यास लिने चाहना छैन ।’

मेस्सी र उनको टोलीले रसिया विश्व कपमा सन्तोषजनक सुरुवात गर्न सकेनन् । २ खेलमा टोलीले मात्र १ अंक जोडेछ । आइसल्यान्डसँग पहिलो खेलमा १–१ को बराबरी खेलेको अर्जेन्टिना पछिल्लो खेलमा क्रोएसियासँग ३–० ले पराजित भएको थियो ।

समूहमा नाइजेरियाले आइसल्यान्डलाई हराएपछि अर्जेन्टिनाको अघि बढ्ने सम्भावना अझै जीवित छ । यद्दपी त्यसका लागि अफ्रिकन टोलीसँगको खेल अर्जेन्टिनाको लागि महत्वपूर्ण हुनेछ ।