काठमाडौं (हाम्रो खेलकुद) – राजधानीमा जारी ललित मेमोरियल यु–१८ फुटबल प्रतियोगितामा मोफसलको हाइलाइफ मोरङ फुटबल क्लबले विजयी सुरुवात गरेको छ । सातदोबाटोस्थित एन्फा कम्प्लेक्सको एस्ट्रो टर्फमा आइतबार भएको समूह ‘बी’ को पहिलो खेलमा मोरङले विभागीय टोली नेपाल पुलिस क्लबमाथि १–० को झिनो जित निकालेको हो । 

मोरङको जितमा मनिष थापाले पहिलो हाफमा गरेको गोल नै निर्णायक बन्यो । पहिलो हाफमा पुलिसलाई दबावमा राखेपनि मोरङले गालका लागि ३९ औं मिनेट कुर्नुपरेको थियो । ३९ औं मिनेटमा मनीष थापाले गोल गर्दै अग्रता दिलाए । दोस्रो हाफमा पुलिसले सुधारिएको खेल पस्केपनि गोल गर्न नसक्दा पहिलो खेलमा हार बेहोर्न पुग्यो ।

आइतबारै भएको अर्को खेलमा ब्रिगेड व्वाइज र जावलाखेलले २–२ गोलको बराबरी खेल्दै अंक बाँडे । प्रतिस्पर्धात्मक बनेको खेलमा जावलाखेलले शिशिर लेखीको गोलबाट अग्रता बनाएको थियो । ब्रिगेडका रजत तिवारीले २८ आं मिेटमा पेनाल्टीमार्फत बराबरी गोल फर्काए ।  ५० औं मिनेटमा पवन शाहीले गोल गर्दै ब्रिगेडलाई खेलमा अग्रता दिलाए ।

७१ औं मिनेटमा सचु गुरुङले बराबरी गोल फर्काए । त्यसपछि दुवै टोलीले थप गोल गर्न नसक्दा खेल बराबरीमा टुंंगियो र १–१ अंक बाँडे । प्रतियोगिता अन्र्तगत सोमबार समूह ‘सी’ का दुई खेलहरु हुनेछ । पहिलो खेलमा झापा ११ र च्यासल युथ क्लबले दिउसो १ः३० बजे खेल्नेछ । ४ बजे हुने सिएमजी क्लब संकटाले नेपाल एपिएफ क्लबको सामना गर्नेछ । समूह ‘ए’ बाट आर्मी र लुम्बिनी तथा समूह ‘डी’ बाट फ्रेन्डस र हिमालयन शेर्पाले क्वार्टरफाइनलमा स्थान बनाएका छन् ।