कजान (एजेन्सी) – फिफा विश्वकप फुटबल अन्र्तगत समूह ‘एच’ को खेलमा सहजै समूह चरण पार गर्ने अनुमान गरिएको कोलम्बिया र पोल्यान्ड आफ्नो पहिलो खेलमै अप्रत्यासित रुपमा पराजित हुन पुग्यो । कोलम्विया जापानसँग तथा पोल्यान्ड सेनेगलसँग समान २–१ ले पराजित भएको थियो । यि दुवै टोली समूहको दोस्रो राउन्डमा आज कजानमा प्रतिस्पर्धा गर्दैछन् । खेल राति ११ः४५ बजेपछि शुरु हुनेछ ।

पहिलो खलेमा हार बेहोरेको कारण दुवै टोली पहिलो जितको खोजीमा हुनेछ । समूह चरणबाट अघि बढ्न दुवै टोलीलाई निश्चित जित आवश्यक छ । समूह चरणको अर्काे खेलमा विजेताद्वयले खेलिरहँदा यी दुई टोलीले पनि ३ अंकका लागि खेल्नेछन् । कोलम्बिया आफ्नै गल्तीमा जापानसँग पराजित हुन पुगेको थियो । खेलको शुरूमै १० खेलाडीमा सीमित कोलम्बियाले जापानलाई बलियो चुनौती दिएपनि पराजित गर्न सकेन ।

कोलम्बिया आफ्नो त्यो गल्तीलाई सुधार गर्दै पोल्यान्डलाई पराजित गर्दै नकआउट चरण पुग्ने योजनामा हुनेछ । प्रतिभावान् खेलाडीको कहिल्यै अभाव नहुने कोलम्बियासँग जेम्स रोड्रिग्वेज, राडामेल फल्काओजस्ता खेलाडीको साथ रहेको छ ।

कोेलम्बियाका कप्तान राडामेल फल्काओले पोल्यान्डविरूद्धको खेल फाइनल सरह भएको बताउदै ३ अंककै लागि खेल्ने बताएका छन् । पोल्यान्डले पनि कोलम्बियालाई पराजित गर्दै अघिल्लो चरण पुग्ने लक्ष्यलाई जीवितै राख्ने योजना बनाएको छ ।

समूह चरण पार गर्ने टोलीका रूपमा हेरिएको पोल्यान्ड पहिलो खेलमा गरेको गल्तीलाई कोलम्बियाविरुद्धको सुधार्ने प्रयासमा हुनेछ । अग्रपंक्तिमा पोल्यान्डको मुख्य हतियार कप्तान रोवर्ट लिवान्डोस्की नै हुनेछ । पोल्यान्ड र कोलम्बियाले एकब आपसमा पाँचपटक खेलेका छन् । जसमा कोलम्वियाले ३–२ ले अघि छ ।