निज्नी (एजेन्सी) – फिफा विश्वकप फुटबल अन्र्तगत आज समूह ‘जी’ दोस्रो चरणको खेलमा उपाधिको दावेदार इङ्ल्यान्डले विश्वकपको नवप्रवेशी पानामासँग प्रतिस्पर्धा गर्दैछ । खेल नेपाली समयअनुसार साँझ ५ः४५ बजेपछि निज्नी नोभोगोरोड स्टेडियममा हुनेछ ।

प्रतिभावान युवा खेलाडीहरुले भरिएको इङ्ल्यान्ड पानामाको चुनौती सहजै पार लगाउदै दोस्रो चरण पुग्ने लक्ष्यमा हुनेछ । इङ्ल्यान्डले नवप्रवेशी पानामालाई हराउन सके समूह चरणको अन्तिम खेलअघि नै अन्तिम १६ मा स्थान पक्का गर्नेछ । पानामा र ट्युनिसिया भने समूह चरणबाटै बाहिरिनेछन् । कप्तान ह्यारी केन उच्च लयमा रहेपनि इङ्ल्यान्ड अझै अन्तिम समयमा चुकिरहेको छ ।

फिनिसिङ लाइनमा चुकिरहेको इङ्ल्यान्डले पानामाविरुद्धको खेलमा यसलाई सुधार्नुपर्ने हुन्छ । शारीरिक रुपमा बलिया पानामालाई इङ्ल्यान्डले कमजोर आक्ने छैन । पानामाको रक्षापङ्ति बलियो भएपछि अग्रपङ्ति भने कमजोर नै छ । टिमलाई फिट हुन संघर्षरत डेल अली र रहिम स्टर्लिङको अभाव खड्किन सक्छ ।

तर, उनीहरुको स्थानमा रुबेन लोफटस र मार्को रासफोर्डले खेल्नेछन् । विश्वकप डेब्यू खेलमा राम्रो खेल्न नसेको पानामा दोस्रो खेलमा प्रदर्शन सुधार गर्ने योजनामा छ । पहिलो खेलमा पराजित भएको पानामा इङ्ल्यान्डसँग सचेत भएर खेल्नेछ । रक्षात्मक खेल्दै पानामा इङ्ल्यान्ड विरुद्ध गोल गर्ने लक्ष्यमा हुनेछ ।