पेरिस (एजेन्सी)– स्पेनिस क्लब बार्सिलोनाका पूर्वस्टार इमानुयल पेटिटले अर्जेन्टिनाका लियोनेल मेस्सीसँग पोर्चुगलका कप्तान क्रिष्टियानो रोनाल्डोको जस्तो कप्तानी गर्ने क्षमता नरहेको बताएका छन् । मेस्सीको कप्तानीमा रहेको अर्जेन्टिना रसिया विश्वकपमा समूह चरण पार गर्नको लागि कठिन संघर्ष गरिरहेको छ ।

सुरुवाती दुई खेल सकिदा १ अंक मात्र जोड्न सकेको अर्जेन्टिना समूहको पुछारमा छ । पछिल्लो खेलमा अर्जेन्टिना क्रोएसियाको हातबाट ३–० ले पराजित भएको थियो । समूह चरणको पहिलो खेलमा भने अर्जेन्टिना विश्वकपको नवप्रवेशी आइसल्यान्डसँग १–१ गोलको बराबरीमा रोकिएको थियो ।

त्यही अवस्थामा रोनाल्डोले आफ्नो कप्तानीमा जारी रसिया विश्वकपमा उत्कृष्ट प्रदर्शन गरिरहेका छन् । सबै चार गोल आफ्नो नाममा लेखाएका छन् । स्पेनविरुद्धको पहिलो खेलमा ह्याट्रिक गरेका रोनाल्डोले मोरक्को विरुद्धको खेलमा पनि एक गोल गरेका थिए । उनी जारी विश्वकपमा ह्याट्रिक गर्ने एक्लो खेलाडी हुन् ।

‘मेस्सी लिडर हैनन् । उनी रोनाल्डो पनि हैनन् । कप्तानी गर्ने मामलामा मेस्सी रोनाल्डो भन्दा पछि नै देखिएका छन् । तर, उनी विश्वको सर्वोत्कृष्ट खेलाडी हुन् । यसमा दुईमत छैन ’ आधुनिक फुटबलका दुई हस्ती मेस्सी र रोनाल्डोको कप्तानीको बारेमा तुलना गर्दै पेटिटले बुक मेकर पाड्डी पावरलाई अन्र्तवार्ता दिदै भनेका छन् ‘तर, मेस्सीमा कप्तानी गर्ने क्षमता रोनाल्डोमा जति देखिएन । बार्सिलोनाका स्टार उनी यो अवस्थाबाट माथि आउन जरुरी छ ।’

म्यानुयलले दक्षिण अमेरिकी विश्वकप छनोटको अन्तिम खेलमा इक्वेडरविरुद्धको खेलमा मेस्सीले गरेको ह्याट्रिकलाई पनि आफ्नो अन्र्तवार्तामा छुटाएका छैनन् । जारी विश्वकपमा उनीबाट यस्तै प्रदर्शनको अपेक्षा गरिपनि उनीबाट त्यो पूरा हुन सकेको छैन ।

१९९८ को विश्व कप विजेता फ्रान्सका ४७ वर्षीय पेटिटले क्रोएसियाविरुद्धको खेलमा टिममा आत्वविश्वास नदेखिएको र एक खेलाडीले अर्का खेलाडीलाई विश्वास नगरेको बताउदै अब पनि यस्तै भए अर्जेन्टिना समूह चरणबाटै घर फर्कने बताए ।

यस्तै पेटिटले अर्जेन्टिनाका प्रशिक्षक जर्ज साम्पाओलीले समूह चरणको दुवै खेलमा खेलाडी छनोटमा ठुलो गल्ती गरेको बताएका छन् । ‘हामी सबैलाई थाहा छ । अर्जेन्टिनाको अहिलेको टिममा विश्वस्तरका नाम चलेका खेलाडीहरुको साथ छ । तर, पनि अर्जेन्टिना गम्भीर देखिएको छैन ।’