रोस्टोभ अन डन (एजेन्सी) – विश्वकप फुटबल अन्तर्गत आज राति समूह चरणको समूह ‘एफ’ को दोस्रो राउन्डका खेलहरु हुदैछ ।

दोस्रो राउन्डको पहिलो खेलमा एसियाली प्रतिद्धन्द्धी दक्षिण कोरियाले विश्वविजेता जर्मनीलाई पराजित गरेको मेक्सिकोको सामना गर्नेछ । खेल राति ८ः४५ बजेपछि रोस्टोभ एरिनामा हुनेछ ।

विश्व विजेता जर्मनीलाई हराएर उच्च मनोवलमा रहेको मेक्सिको दोस्रो खेलमा जित निकाल्दै अन्तिम १६ मा पुग्ने लक्ष्यमा हुनेछ । दोस्रो चरण पुग्ने मेक्सिकोको लक्ष्यमा उच्च फर्ममा रहेका हिर्भिक लोजानो मुख्य हतियार हुनेछ । हिर्भिङ लोजानोले जर्मनीविरुद्धको खेलमा निणार्यक गोल गरेका थिए । तर, मेक्सिकोले कोरियाको बलियो डिफेन्स लाइन पार गर्नुपर्ने हुन्छ ।

यता, कोरिया पहिलो खेलको गल्तीलाई सुधार्दै मेक्सिकोलाई पराजित गरेर अघि बढ्ने योजनामा हुनेछ । पहिलो खेलमा स्वीडेनसँग १–० ले पराजित भएपनि कोरियाले उत्कृष्ट प्रदर्शन गरेको थियो । कोरियाबाट गोलमात्र ननिस्कदा पराजित हुन परेको थियो । बलियो डिफेन्स लाइन रहेको कोरियाले गोल स्कोरिङमा सुधार गर्न सके मेक्सिकोलाई पराजित गर्न सक्नेछ । राम्रा खेलेपनि गोल खाने र हार्ने प्रवृत्तिको कोरिया समूह चरणबाट अघि बढ्न राम्रो खेल्नुपर्नेमा दबाब छ ।

कोरिया र मेक्सिको अहिलेसम्म ६ पटक एक आपसमा खेलेका छन् । दुवै टिमले समान २ जित, बराबरी र हारको सामना गरेको छ । पछिल्लो पटक यि दुई टिमले १९९८ को फ्रान्स विश्वकपको समूह चरणमा प्रतिस्पर्धा गरेको थियो । त्यतिबेलो मेक्सिको ३–१ ले विजयी भएको थियो ।