मस्को (एजेन्सी) –फिफा विश्वकप फुटबल प्रतियोगिताअन्तर्गत समूह ‘जी’ को दोस्रो चरणको एक खेल हुदैछ । स्पार्कटाक स्टेडियम मस्कोमा उपाधिको दावेदार बेल्जियमले ट्युनिसियाको सामना गर्दै छ । खेल साँझ ५ः४५ बजेपछि शुरु हुनेछ ।

समूह चरणको पहिलो खेलमा पानामामाथि ३–० को सहज जित निकालेको बेल्जियम ट्युनिसियालाई पनि सहजै पराजित गर्दै नकआउट चरणमा पुग्ने लक्ष्यमा हुनेछ ।

स्टार खेलाडीहरुको जमघट रहेको बेल्जियम ट्युनिसियाविरुद्धको खेलमा सहजै हावी हुने अनुमान गरिएको छ । अघिल्लो खेलमा दुई गोल गरेका स्ट्राइकर रोमेलु लुकाकु ट्युनिसियाको खेलमा पनि हावी हुने अनुमान गरिएको छ । तर, इंग्ल्यान्डसँग अन्तिम समयमा गोल खादा पराजित हुन पुगेको ट्युनिसियाले बेल्जियमलाई रोक्ने योजनामा हुनेछ ।

अन्तिम मिनेटमा गोल खांदा खेल गुमाएको ट्युनिसियाले बेल्जियमविरुद्धको खेलमा पुनरागमन गर्ने लक्ष्य बनाएको छ । इंग्ल्यान्डविरुद्धको खेलमा अन्तिम समय पराजित हुनु ट्युनिसियाका लागि दुर्भाग्य साबित हुदा ट्युनिसियाले बेल्जियमसँग धैर्यतापूर्वक खेल्नेछ । दोस्रो चरणमा पुग्ने आसा बाँकी राख्न ट्युनिसिलाई जित आवश्यक छ ।

दुई टिम चौथोपटक आमने समाने हुन लागेको हो । यसअघिका तीन प्रतिस्पर्धामा दुवै टिमले समान १ जित, बराबरी र हारको नतिजा निकालेको छ । १९९२ को मैत्रीपूर्ण खेलमा ट्युनिसिया २–१ ले विजयी भएको थियो । २००२ को विश्वकपमा खेल १–१ गोलको बराबरीमा सकिएको थियो । २०१४ को मैत्रीपूर्ण खेलमा बेल्जियम १–० ले विजयी भएको थियो ।