काठमाडौं .(हाम्रो खेलकुद) – फ्रेन्डस् क्लब र हिमालयन शेर्पा क्लब राजधानीमा जारी ललित मेमोरियल यु–१८ फुटबल प्रतियोगिताको क्वार्टर फाइनलमा प्रवेश गरेको छ । फ्रेन्डस् समूह ‘डी’ को विजेताको रुपमा तथा हिमालयन शेर्पा समूह उपविजेतको रुपमा अन्तिम आठमा पुग्न सफल भएको हो ।

फ्रेन्डस्ले समूहमा ८ अंक् जोड्न सफल भयो । उपविजेता बनेको हिमालयन शेर्पाले ७ अंक जोड्न सफल भयो । सातदोबाटोस्थित एन्फा कम्प्लेक्सको एस्ट्रो टर्फमा शुक्रबार भएको समूह चरणको अन्तिम खेलमा फ्रेन्डस्ले लक्ष्मी हुण्डाई मनाङ–मस्र्याङ्दीमाथि २–१ को जित निकाल्दै समूह विजेता बन्न सफल भएको हो ।

फ्रेन्डस् को जितमा दुवै गोल कप्तान अनिल महर्जनले गरे । मनाङका लागि नवल गुरुङले एक गोल फर्काए । फ्रेन्डस्ले खेलको १२ औं मिनेटमा नै अनिलको गोलबाट अग्रता बनाएको थियो । २३ औं मिनेटमा नवल ले गोल गरेपछि पहिलो हाफ १–१ गोलको बराबरीमा सकिएको थियो ।

७६ औं मिनेटमा अनिलले गोल गरेपछि फ्रेन्डस् ले खेलमा अग्रता बनायो । अन्ततः त्यही गोल नै फ्रेन्डस्को जितमा निर्णायक बन्यो । हारसँगै मनाङ प्रतियोगिताको समूह चरणबाटै बाहिरिएको छ । यता, शुक्रबारै भएको समूहको अर्को खेलमा हिमालयन शेर्पाले सुदूरपश्चिमाञ्चल फुटबल क्लबलाई ५–१ को फराकिलो अन्तरले पराजित गर्दै क्वार्टरफाइनलमा पुग्न सफल भयो । टोलीको जितमा सन्जय धिमाल र दिवस उराउ र अनिल आलेले समान १ गोल गरे ।