भोल्गोग्राड (एजेन्सी) – पहिलो खेलमा उपाधिको दाबेदार अर्जेन्टिनालाई १–१ गोलको बराबरीमा रोकेर मनोबल बढाएको आइसल्यान्डले विश्व कपको समूह चरणमा आज राति अफ्रिकी राष्ट्र नाइजेरियाको सामना गर्दैछ । खेल भोल्गोग्राड एरिनामा राति ८ः४५ बजेपछि शुरु हुनेछ ।

आइसल्याण्ड रसिया विश्वकपमा डेब्यु गर्ने दुई टोली मध्येको एक हो । त्यही आइसल्यान्डले विश्वकपको डेब्यु खेलमा लियोनेल मेस्सीको अर्जेन्टिनालाई १–१ गोलको बराबरीमा रोकेर सनसनी मच्चाउन सफल भयो । आइसल्यान्ड र नाइजेरियाबीचको खेल उपाधिको दाबेदार मानिएको अर्जेन्टिनाको भविष्यसँग पनि जोडिएको छ ।

अर्जेन्टिना समूहको अर्को खेलमा क्रोएसियासँग ३–० ले स्तब्ध भएको थियो । क्रोएसिया अन्तिम १६ मा पुगिसकेको छ । यो खेलमा आइसल्याण्डले जित हात पारे अर्जेन्टिना समूह चरणबाटै बाहिरिने सम्भावना हुनेछ । बराबरीले अर्जेन्टिनाले राहतको सास फेर्नेछ । र समूह चरणको अन्तिम खेलमा नाइजेरियालाई फराकिलो अन्तरले पराजित गरे अघिलल्लो चरणमा प्रवेश गर्ने अवसर प्राप्त गर्नेछ ।

अन्डर डग टिमको रुपमा पहिचान बनाएको आइसल्यान्डले उपाधिको दावेदार टिम अर्जेन्टिनालाई बराबरीमा रोकेर उच्च मनोबलमा रहेको आइसल्याण्ड आफ्नो दोस्रो खेलमा नाइजेरियालाई निराश पार्दै अघि बढ्ने अभियानमा हुनेछ । व्यक्तिगत खेलाडीभन्दा पनि टिम प्रदर्शनमा विश्वास गर्ने आइसल्याण्ड संगठित प्रदर्शन गर्दै नाइजेरियावरुद्ध उत्रने पक्का छ ।

समूहमा आइसल्याण्डले १ अंक जोड्न सफल हुदा नाइजेरिया अंकविहीन छ । नाइजेरियालाई पराजित गर्न आइसल्याण्डको नकआउट चरणको सम्भावना बलियो हुनेछ । बराबरीमा रोकिएको अवस्थामा भिनो सम्भावना जीवितै रहँदा पराजित भए आइसल्याण्डको विश्वकप यात्रा समूह चरणमै टुंगिनेछ ।

आइसल्याण्ड जुनसुकै टिमसँग खेल्दा पनि हार नमान्ने टोली हो । तर, टिमका मुख्य खेलाडी जोहान गुडमुन्डसनको चोट आइसल्याण्डको लागि समस्या हुन सक्छ । उनी नाइजेरियाविरुद्धको खेलमा खेल्नेमा शंका छ । यता, समुह चरणको पहिलो खेलमा क्रोएसियासँग बेहोरेको हारले नाइजेरियालाई आइसल्याण्डविरुद्धको खेलमा जितको लागि दबाब बढेको छ ।

आइसल्याण्डसँग पनि पराजित भए नाइजेरियाको विश्वकप यात्रा समूह चरणमै सकिनेछ । विश्वकपमा अघिल्लो यात्रामा रहिरहन जित बाहेकको विकल्प छैन । विश्वकपमा नाइजेरियाले विश्वकपका १३ खेलमध्ये अहिलेसम्म १ खेलमा मात्र जितेको इतिहास छ । ३ बराबरी खेलेको नाइजेरियाले ९ हारको सामना गरेको छ । नाइजेरियाले ४ वर्ष अघि बोस्निया हर्ज गोभिनालाई पराजित गरेको थियो ।