मस्को (एजेन्सी)– ब्राजिलियन सुपर स्टार नेयमार विश्व कपको समूह चरणमा कोस्टा रिकाविरुद्धको खेलमा पहिलो रोजाईमा खेल्ने प्रशिक्षक टिटेले पक्का गरेका छन् । गोलीगाठाको चोटका कारण मंगलबारको अभ्यास गुमाएपछि नेयमारले खेल्नेमा शंका थियो । विश्व कपको दाबेदार मध्येको एक ब्राजिलले विश्व कप समूह चरणको पहिलो खेलमा स्वीजरल्यान्डसँग १–१ बराबरी खेलेको थियो ।

‘अहिले पनि अवस्था त्यस्तो हो । झन्डै साढे तीन महिनापछि भर्खरै मैदान फर्केका नेयमारले स्वीजरल्यान्डसँग पुरा ९० मिनेट खेले’, टिटेले भने, ‘चोटका पूर्ण रुपमा ठिक हुन त्यसले समय लिन्छ । मलाई लाग्द कम्तीमा ५ खेल लाग्छ । उनी त्यसको प्रक्रियामा छ । त्यसैले चिन्ता लिनुपर्ने कारण छैन ।’

फेब्रुअरीमा पेरिस सेन्ट जर्मेनबाट गम्भिर घाइते भएका नेयमारले ब्राजिल फर्केर शल्यक्रिया गरेका थिए । लामो समयपछि मैदान फर्केका उनले जुन १० मा अस्ट्रियाविरुद्ध ३–० को जितमा गोल गरेका थिए । टिटले टोली कोस्टा रिकाविरुद्धको खेलका लागि पुरै केन्द्रित रहेको बताएका छन् ।

पहिलो खेललाई लिएर आफुमा पनि उत्साह रहेको उल्लेख गर्दै टिटले भने, ‘पहिलो खेलमा मेरो उत्साह सकिएको छ । अब हामी कोस्टा रिका विरुद्धको खेलमा केन्द्रित छौं ।’ यसैबीच, नेयमारले चार वर्षअघि ब्राजिलमा भएको विश्व कपमा चोटका कारण कसरी सपना तोडिएको भन्ने भावुक भिडियो सामाजिक सञ्जालमा अपलोड गरेका छन् ।