काठमाडौं (हाम्रो खेलकुद) – दुई पटकको च्याम्पियन विभागीय त्रिभुवन आर्मी क्लब राजधानीमा जारी तेस्रो संस्करणको ललित स्मृति यु–१८ फुटबल प्रतियोगिताको समूह ‘ए’ बाट अपराजित रहेर समूह विजेता बन्दै क्वार्टरफाइनलमा पुग्न सफल भएको हो ।

समूह चरणको आफ्नो अन्तिम खेलमा आर्मीले मच्छिन्द्रमाथि ८–२ को फराकिलो जित निकाल्यो । आर्मीको जितमा कप्तान दिनेश हेन्जन र दिपेश आलेले ह्याट्रिक पूरा गरे । सुनिल श्रेष्ठले एक गोल गर्दा एक गोल उपहार पाएको थियो । मच्छिन्द्रका शरद राई र पुकार खड्काले सान्त्वना गोल फर्काए ।

सातदोबाटोस्थित एन्फा कम्प्लेक्सको खेल मैदानमा बिहिबार भएको खेलमा आर्मीले खेलको सातौ मिनेटमा नै दिपेश अग्रता बनाएको थियो । २५ औं मिनेटमा दिपेशले गोल गर्दै आर्मीको अग्रता दोब्बर पारे । ३० औं मिनेटमा अर्काे गोल गर्दै ह्याट्रिक पूरा गरे । ३३ औं मिनेटमा शरद राईले गोल गर्दै गोल अन्तर कम गरेका थिए । तर, ३९ औं मिनेटमा कप्तान दिनेश हेन्जनले गोल गरेपछि आर्मीले पहिलो हाफमै ४–१ को आरामदायी बनाएको थियो ।

पहिलो हाफमा ४ गोल गरेको आर्मीले दोस्रो हाफमा पनि ४ गोल गर्न सफल भयो । ५२ औं मिनेटमा पुकार खड्काले गोल गरेपछि मच्छिन्द्रले गोल अन्तरमा ४–२ मा झारेको थियो । ६० औं मिनेटमा कप्तान दिनेशले गोल गर्दै आर्मीलाई ५–२ को अग्रतामा राखे । ६५ औं मिनेटमा सुनिल श्रेष्ठले गोल गरेपछि आर्मीले खेलमा ६–२ को अग्रता बनायो । ७७ औं मिनेटमा आर्मीले आत्मघाती गोलको उपहार पाएको थियो । इन्जुरीमा समयमा कप्तान दिनेशले ह्याट्रिक पूरा गर्दै आर्मीलाई ८–२ को फराकिलो जित दिलाए ।

बिहिबारै भएको अर्काे खेलमा लुम्बिनीले सरस्वती युवा क्लबलाई २–० ले पराजित गर्दै क्वार्टरफाइनलमा स्थान बनाएको छ । सरस्वतीमाथिको जितसँगै लुम्बिनीले समूहमा ७ अंक जोड्दै अन्तिम आठमा स्थान पक्का गरेको हो ।

लुम्बिनीको जितमा प्रिनस गुरुङ र अमृत गुरुङले गोल गरे । खेलको चौथो मिनेटमा नै लुम्बिनीले प्रिन्स गुरुङको गोलबाट अग्रता बनाएको थियो । पहिलो हाफमा १–० को अग्रता बनाएको लुम्बिनीका लागि ६९ औं मिनेटमा अमृत गुरुङले गोल गर्दै लुम्बिनीलाई २–० को जित दिलाए । सरस्वतीमाथिको महत्वपूर्ण जितपछि लुम्बिनीका प्रशिक्षक बिकास गुरुङले खेलाडीहरुको मिहेनतले नै क्वार्टरफाइनलमा प्रवेश गर्न सफल भएको बताउदै सबै खेलाडीलाई धन्यवाद दिए ।

प्रतियोगिता अन्र्तगत शुक्रबार फ्रेण्डस् र मनाङ तथा हिमालयन शेर्पा र सुदूरपश्चिमबीच खेल हुनेछ । यि तीनै टोलीको क्वार्टरफाइनल पुग्ने सम्भावना जीवित छ । समूहको चार खेलबाट थ्री स्टारको ५ अंक छ । फ्रेन्डसको ५, शेर्पा र सुदूरको समान ४ र मनाङको ३ अंक छ ।