बलियो डेनमार्क, आत्मविश्वासी अष्ट्रेलिया

सामरा (एजेन्सी) – समूह ‘सी’ मा डेनमार्क पहिलो जितसहित नकआउट चरण नजिक छ । समुहमा बलियो देखिएको डेनमार्क दोस्रो खेलमा अष्ट्रेलियालाई पराजित गर्दै नकआउट चरण पुग्ने सम्भावनालाई बलियो बनाउने योजनामा हुनेछ । डेनमार्क र अष्ट्रेलियाबीचकबो खेल साँझ ५ः४५ बजेपछि सामरा एरिनामा हुनेछ ।

अन्डर डगको छवि बनाएको डेनमार्क पछिल्लो १६ खेलमा अपराजित छ । जसमा ९ जित र ७ बराबरी छन् । २०१६ अक्टुबरमा मोन्टेनेग्रोसँग १–० ले पराजित भएयता डेनमार्कले हार बेहोरेको छैन । पेरुविरुद्धको खेलमा डेनमार्कलाई भाग्यको पनि साथ रहेको थियो ।

पहिलो हाफमै पाएको पेनाल्टीमा पेरु गोल गर्न असमर्थ रहेको थियो । पेरुविरुद्धको खेलमा चोट लागेका मिडफिल्डर विलियम केभिस्ट टिममा हुनेछैन । टोलीमा उनको अभाव खड्किन सक्छ ।

पहिलो खेलमा फ्रान्ससँग राम्रो खेल्दा पनि २–१ गोलले पराजित भएको अस्ट्रेलिया आत्मविश्वासी एसियन टिम भएकाले उसले डेनमार्कलाई दबाबमा राख्ने सक्ने क्षमता राख्छ । तर, अष्ट्रेलियाले कुनै गल्ती गर्नुहुने छैन । डेनमार्कले जित हात पारे समूह चरण पार गर्ने लगभग पक्का हुनेछ । अस्ट्रेलियालाई दोस्रो चरणमा पुग्न डेनमार्कलाई हराउनु पर्ने हुन्छ ।