मस्को (एजेन्सी)– पोर्चुगलका कप्तान क्रिस्टियानो रोनाल्डोले शीर्षस्थानमा रहँदै समूह चरणको अन्त्य गर्नका लागि आउने खेलमा प्रदर्शनमा सुधार गर्नुपर्ने बताएका छन् । २ खेलमा टोलीका लागि सम्भव सबै ४ गोल गरेको सुपर स्टार रोनाल्डोले नै गरेका हुन् ।

मोरोक्कोलाई बुधबार १–० ले हराउँदा होस् वा पहिलो खेलमा स्पेनलाई ३–३ मा रोक्न होस् सबैमा उनी नै नायक रहे । जसका कारण उनी दुवै खेलमा म्यान अफ दी म्याच बन्न सफल भए । मोरोक्कोविरुद्ध उनले दिलाएको अग्रतालाई जोगाउने क्रममा गोलकिपर रिउ पोर्टिकोले पनि केहि राम्रा बचाउ गरे ।

समूह बीमा मोरोक्को समूह चरणबाट बाहिरिएपनि बाँकी टोलीबीच अघिल्लो चरणका लागि प्रतिस्पर्धा छ । पोर्चुगल र स्पेनको समान ४ अंक छ भने इरानको २ अंक छ । अब पोर्चुगलले इरान र स्पेनले मोरोक्कोको सामाना गर्नेछ ।

‘समूह चरणको अन्तिम खेलमा अझै सुधारिएको प्रदर्शन गर्ने आशामा हामी छौं,’ जारी विश्व कपका उच्च गोलकर्ता समेत रहेका रोनाल्डोले भने, ‘हामी लगभग नकआउट चरणमा पुगेका छौं । हामी हरेक पटकको खेललाई महत्वका साथ लिन्छौं । हामी समूहको विजेता बन्ने प्रयासमा छौं ।’

मोरोक्कोसँगको खेल स्मरण गर्दै उनले भने, ‘हामीलाई थाहा थियो । हार्दा हामी बाहिरिन्छौं भन्ने हेक्का थियो । मोरोक्कोले आफ्नो सबै शक्ति लगाउँछ भन्ने थाहा थियो । निश्चिय नै उनीहरुले बलियो सुरुवात गर्दा आश्चार्य लाग्यो । म गोल गर्न सफल भए त्यसमा खुसी छु ।’

इरानलाई हराउन सके पोर्चुगल समूहको विजेता बन्न सक्छ । स्पेनलाई पनि मोरोक्कोलाई हराउन सहज हुने छैन । मोरोक्कोले इरान र पोर्चुगल दुवै खेल समान १–० को झिनो अन्तरले गुमाएको थियो । अर्को तिर स्पेनले पनि स्पेनले पनि पोर्चुगलले जस्तै इरानमाथि १–० को साँघुरो जित हासिल गरेको थियो ।

अहिले पनि समूह विजेताको टुंगो लागिसकेको छैन । अहिलेको अवस्था हेर्दा अन्तिम १६ मा पोर्चुगलले रसियाको सामना गर्नुपर्ने सम्भावना छ । समूह ‘ए’मा उरुग्वेलाई सम्भावित विजेता र रसियालाई उपविजेताका रुपमा हेरिएको छ । यद्दपी अन्तिम १६ मा पुगिसकेका रसिया र उरुग्वेबीचको खेल हुन बाँकी छ ।