6 years ago
June 21, 2018
नोभोगोरो (एजेन्सी) – विश्वकप सुरु हुनुभन्दा अघि दक्षिण अमेरिकी राष्ट्र अर्जेन्टिनालाई उपाधिको दाबेदार टोलीमध्ये एकको रुपमा हेरिएको थियो । समूह चरणको पहिलो खेलमा विश्वकपको नयाँ टोली आइसल्याण्डसँग बराबरीमा रोकिएपछि अर्जेन्टिनालाई दोस्रो चरण पुग्न दबाब सिर्जना भएको छ । ‘गर या मर’ को अवस्थामा रहेको अर्जेन्टिना यही दबाबकाबीच दोस्रो चरण पुग्ने लक्ष्यलाई जीवित राख्न दोस्रो खेलमा क्रोएसियाको सामना गर्दैछ ।
खेल नोभोगोरोडस्थित निज्नी स्टेडियममा नेपाली समयअनुसार बिहीबार राति ११ः४५ बजे हुनेछ । इतिहासलाई हेर्ने हो भने, अर्जेन्टिना क्रोएसियामाथि हावी छ । यी दुई टोली चारपटक आमनेसामने भएका छन् । जसमा अर्जेन्टिनाले २ जित र १ बराबरी र १ हार बेहोरेको छ । पछिल्लोपटक यी दुई टिमले २०१४ मा मैत्रीपूर्ण खेल खेलेको थियो । जसमा अर्जेन्टिना २–१ ले विजयी भएको थियो ।
तर, फुटबलमा इतिहास हेरेर मात्रै हुदैन । पछिल्लो समय क्रोएसियाले पनि राम्रो फुटबल खेलिरहेको छ । दोस्रो चरण प्रवेशका लागि अर्जेन्टिनालाई निश्चित जित आवश्यक छ । त्यसैले अर्जेन्टिना दबाबकाबीच क्रोएसियालाई पराजित गर्दै अघिल्लो चरण पुग्ने लक्ष्यमा हुनेछ । बराबरीले अर्जेन्टिनाको दोस्रो चरण पुग्ने सम्भावना न्यून बन्नेछ । पराजित भएको खण्डमा भने अर्जेन्टिनाको विश्वकप यात्रा समूह चरणमै टुंगिनेछ ।
समूह ‘डी’ मा क्रोएसिया ३ अंकसहित शीर्षस्थानमा रहँदा अर्जेन्टिना दोस्रो तथा आइसल्यान्ड तेस्रो स्थानमा छन् । यस समूहबाट अर्जेन्टिनालाई समूह विजेताको रूपमा हेरिँदा पहिलो खेलमै बराबरीपछि पक्कै पनि दबाबमा हुनेछ । दबाबमा पनि खेल्न सक्ने अर्जेन्टिनासँग क्षमता छ । क्रोएसियालाई पराजित गर्दै अर्जेन्टिना दबाबका बीच राम्रो फुटबल खेल्न सक्ने टोलीको रूपमा रहेको प्रमाणित गर्ने महत्वपूर्ण अवसर छ ।
अर्जेन्टिनाका प्रशिक्षक जर्ज साम्पाओलीले क्रोएसियाविरुद्धको खेल फाइनल सरह भएको बताएका छन् । ‘क्रोएसियाविरुद्धको खेल हाम्रो लागि फाइनल सरहको खेल हो । हामीलाई दोस्रो चरण प्रवेश गर्न जितबाहेक विकल्प छैन ’ प्रशिक्षक साम्पाओलीले भने, ‘हामीले राम्रो खेल्दाखेल्दै पनि अनपेक्षित रूपमा आइसल्यान्डसँग रोकिन पुग्यो । यसले हामीलाई समूहमा असहज बनाएको छ । तर, पनि हामी निश्चित जितका लागि खेल्नेछौं ।’
प्रशिक्षक साम्पाओलीले आइसल्यान्डविरुद्धको खेलमा खेलेका केही खेलाडी क्रोएसियाविरुद्धको खेलमा परिवर्तन हुने बताएका छन् । अर्जेन्टिनाले सन् २०१४ को विश्वकपको क्वार्टरफाइनलमा बेल्जियमलाई पराजित गरे यता विश्वकपमा तीन खेल खेल्दा जित हात पार्न सकेको छैन । सेमिफाइनलमा नेदरल्यान्डलाई पेनाल्टी सुटआउटमा पन्छाएको अर्जेन्टिना फाइनलमा जर्मनीसँग अतिरिक्त समयमा पराजित हुन पुगेको थियो ।
त्यसपछि रसिया विश्वकपको पहिलो खेलमा आइसल्यान्डसँग १–१ गोलको बराबरीमा रोकिन पुग्यो । अर्जेन्टिनासँग विश्वस्तरका लियोनेल मेस्सी, सर्जियो अगुएरो र निकोलास ओटामेन्डीजस्ता खेलाडी रहेका छन् । क्रोएसियाविरुद्धको खेलमा मेस्सीसँगै अगुएरो टिमको मुख्य हतियार हुनेछन् । तर, उनीहरू क्रोएसियाको डिफेन्सको निगरानीमा हुनेछन् ।
अग्रपंक्ति राम्रो भए पनि डिफेन्समा कमजोर देखिएको अर्जेन्टिनालाई त्यही नियति नदोहोरिएला भन्न सकिन्न । किनभने क्रोएसियासँग मारियो म्यान्जुकिक, इभान राकिटिक, पेरिसिक र लुका मोड्रिकजस्ता खेलाडी छन्, उनीहरूले जुनसुकै बेला पनि खेल परिवर्तन गर्न सक्छन् । यता, पहिलो जितले उत्साहित क्रोएसिया बिना कुनै दबाब अर्जेन्टिनाविरुद्ध उत्रने अनुमान गरिएको छ ।
क्रोएसियाले पहिलो खेलमा अफ्रिकी मुलुक नाइजेरियालाई २–० ले पराजित गरेको थियो । नकआउट चरण पुग्ने सम्भावना रहेको क्रोएसिया अर्जे्न्टिनालाई पनि पराजित गर्दै समूह विजेताको रूपमा अघि बढ्ने लक्ष्यमा हुनेछ । सन्तुलित फुटबल खेलिरहेको क्रोएसिया सकेसम्म जित्ने या बराबरीमा योजनामा हुनेछ । बराबरीले पनि क्रोएसियाको प्रिक्वार्टरफाइनल पुग्ने सम्भावना जीवितै रहनेछ ।
September 20, 2024
सुशील पन्त क्षेत्री,चितवन प्रतिस्पर्धात्मक खेलमा राइजिङ स्टार भुमहीलाई पराजित गर्दै आयोजक हानामी भरतपुर फुटबल क्लब (बिएफसी) गोल्डेन इमिनेन्ट दोस्रो चितवन गोल्डकपको क्वाटरफाइनलमा प्रवेश गरेको छ । नेपाल प्रहरी शिक्षालयको मैदानमा आज भएको खेलमा बिएफसीले राइजिङलाई ३-२ ले हरायो । बिएफसीको जितमा राज भुसालले २ तथा सन्जीब बिष्टले १ गोल गरे । राङजिङ स्टारका फागुराम थारु […]
September 20, 2024
सुमन अधिकारी, बुटवललिस्नु युवा क्लब रुपन्देहीमा जारी ३६ औं झरना रनिङ शिल्ड फुटबल प्रतियोगिताको क्वाटरफाईनलमा प्रवेश गरेको छ । स्वर्गिय खगी गुरुङसेनीको पुण्य स्मृतिमा झरना स्पोर्टस क्लबको आयोजनामा जारी प्रतियोगिताको तेस्रो दिन शुक्रवार सुनौलो संगम युवा क्लबलाई ४-० ले पराजित गर्दै लिस्नु समुह एबाट अन्तिम ८ मा पुग्ने पहिलो टोली बनेको छ । लिस्नुलाई जित […]
September 20, 2024
काठमाडौं(हाम्रो खेलकुद) – अमिशा कार्की र चन्द्रा भन्डारीले ह्याट्रिक गरेको एन्फा महिला लिगको खेलमा त्रिभुवन आर्मी क्लबले चन्द्रपुर नगरपालिकामाथि फराकिलो जित हात पारेको छ । सातौं खेलमा पाँचौ जित निकाल्ने क्रममा शुक्रवार आर्मीले चन्द्रपुरलाई १०-० ले पराजित गर्यो ।एन्फा कम्प्लेक्स सातदोबाटोमा भएको खेलमा आर्मीकस अमिशा र चन्द्रासँगै हिमा चौधरी, दिपा शाही, शर्मिला मगर र अन्जना […]