मस्को (एजेन्सी) – आफ्नो सुपरस्टार खेलाडी क्रिष्टियानो रोनाल्डोप्रेरित पोर्चुगलले आज समूह चरणको दोस्रो खेलमा अफ्रिकी मुलुक मोरक्कोसँग प्रतिस्पर्धा गर्दैछ । खेल लुज्निकी स्टेडियम मस्कोमा साँझ ५ः४५ बनेपछि सुरु हुनेछ । पहिलो खेलमा उपाधिको दावेदार मानिएको स्पेनलाई अन्तिम समयमा ३–३ गोलको बराबरीमा रोक्न सफल पोर्चुगल मोरोक्कोसँग सचेत रहँदै जितका लागि मैदान उत्रनेछ ।

मोरक्कोमाथि जित हात पारे पोर्चुगलले दोस्रो चरण पुग्ने सम्भावना जीवितै राख्नेछ । बराबरीको नतिजाले भने पोर्चुगलको दोस्रो चरण पुग्ने सम्भावना झिनो हुनेछ । टिममा रोनाल्डोबाहेक औसतका खेलाडी रहेपनि उनीहरूले संगठित प्रदर्शन गरेका छन् । उनीहरूले संगठित प्रदर्शन गर्दा रोनाल्डोले खुलेर खेल्ने मौका पाएका थिए ।

मोरक्कोमाथि युरोकप च्याम्पियन पोर्चुगलसँग पछिल्ला चार संस्करणमा गोल गर्न सफल रोनाल्डो फेरि एकपटक हावी हुन सक्नेछ । पहिलो खेलमै ह्याट्रिक गरेका रोनाल्डोले  विश्वकपमा समेत अमिट छाप छाड्ने संकेत गरिसकेका छन् । रोनाल्डोेलाई जोआ मारियो, बर्नाडो सिल्भाले राम्रो साथ दिएका थिए । तर, इतिहास हेर्ने हो भने पोर्चुगल मोरक्कोमाथि कमजोर छ ।

यी दुई टोली दोस्रोपटक आमनेसमाने हुन लागेका हुन् । इतिहास हेर्दा मोरक्को माथि छ । मोरक्कोले सन् १९८६ को विश्वकपमा पोर्चुगललाई ३–१ ले पराजित गरेको थियो । यता, इरानविरुद्धको खेलमा आफ्नै गल्तीमा गोल खाँदा पराजित हुनुपरेको मोरक्को पोर्चुगलविरुद्ध सचेत भएर खेल्ने पक्का छ ।

समूह चरणको पहिलो खेलमा इरानसँग १–० ले पराजित भएको मोरक्को निक्कै दवावमा रहेको छ । त्यसपछि खेलाडीको चोटल मोरक्कोलाई झनै सताएको छ । इरानविरुद्धको खेलमा चोट बोकेका डिफेन्डर नोर्दिन अम्राबात नाबिल डिरर घुडाँको चोटका कारण आजको खेल गुमाउन सक्ने सम्भावना छ ।