मस्को (एजेन्सी)– लियोन मेस्सी पेनाल्टीमा गोल गर्न चुकेकै कारण अर्जेन्टिना आइसल्यान्डसँग १–१ को बराबरीमा रोकिएको भनाईमा अर्जेन्टिनाका महान खेलाडी डिएगो म्यारोडोनाले अस्वीकार गरेका छन् । सर्जियो अगुएरोले पहिलो गोल गरेपनि आइसल्यान्डका लागि अल्फ्रेड फिबोगासनले बराबरी गोल फर्काएका थिए ।

अर्जेन्टिनालाई जिताउने अवसर मेस्सीसँग थियो । तर, प्राप्त पेनाल्टीमा उनले गोल गर्न सकेनन् । उनको प्रहारलाई आइसल्यान्डका गोलकिपर हानेसप्रो हालडोर्सनले रोको थिए । समर्थक र सञ्चारमाध्यमले भने मेस्सीका कारण अर्जेन्टिनाले अंक गुमाउनु परेको र ३ अंक जोड्न नसकेको उल्लेख गरेका छन् ।

‘म खेलाडीलाई दोष दिन चाहन्न,’ म्यारोडोनाले भने,‘हाम्रो सामूहिक प्रयासमै कमी थियो । म कुनै खेलाडीलाई मात्र दोष दिन्न । मेस्सीलाई पनि दिन चाहन्न । मैले आफुले खेल्दा ५ वटा पेनाल्टी चुकाएको थिए । तर पनि म डिएगो अर्मान्डो म्यारोडोन हु । मलाई लाग्दैनकी मेस्सीले पेनाल्टी चुकाएकै कारण हामीले २ अंक गुमाएका हौं ।’

समूह चरणमा अब क्रोएसिया र नाइजेरियाविरुद्ध हुने खेलमा सफल नतिजा निकाल्न सके अर्जेन्टिना नकआउट चरणमा पुग्न सक्छ । बाँकी दुवै खेल जित्दा टोली समूह विजेता बन्ने सम्भावना पनि छ । मेस्सीले पहिलो खेलको निराशाजनक प्रदर्शनलाई विर्सेर बाँकी दुई खेलमा केन्द्रित हुनुपर्नेछ । यदि उनका विषयमा गरिएको चर्चा सहि हो भने यो उनको अन्तिम विश्वकप हुनेछ । त्यसअघि उनी खेल जीवनलाई सफल पार्न पक्कै पनि विश्व कप जित्न चाहन्छन् ।