लुम्बिनीको पहिलो जित

काठमाडौं (हाम्रो खेलकुद) – मोफसलको लुम्बिनी फुटबल क्लबले ललित स्मृति यु–१८ फुटबलमा पहिलो जित निकालेको छ । प्रतियोगिता अन्र्तगत आइतबार भएको खेलमा लुम्विनीले न्युरोड टिम एनआरटीलाई २–१ ले पराजित गर्दै प्रतियोगितामा पहिलो जित निकालेको हो ।

सातदोबाटोस्थित एन्फा कम्प्लेक्सको खेल मैदानमा भएको प्रतिस्पर्धात्मक खेलमा लुम्विनीले खेलको ११ औं मिनेटमा अग्रता बनाएको थियो । लुम्विनीका मोहन थापाले गोल गरेका थिए । पहिलो हाफमा १–० को अग्रता बनाएको लुम्विनीले दोस्रो हाफको शुरुमै गोल खान पुग्यो ।

एनआरटीका रोजित पुडासैनीले ५२ औं मिनेटमा बराबरी गोल फर्काएका थिए । ६४ औं मिनेटमा सुन्दर खड्काले गोल गर्दै लुम्विनीलाई फेरि २–१ को अग्रता दिलाए । त्यसपछि थप गोल हन नसक्दा लुम्बिनी २–१ ले विजयी हुन सफल भयो । जितपछि लुम्विनीले समूह ‘ए’ मा तीन अंक जोड्न सफल भएको छ । पराजित एनआरटी तीन खेलबाट ६ अंकसहित दोस्रो स्थानमा छ ।