सिमरा (हाम्रो खेलकुद) – वडा नम्बर १ ले जीतपुरसिमरा उपमहानगर स्तरीय प्रथम मेयर कप फुटबल प्रतियोगिताको उपाधि जितेको छ । सिमरा रंगशालामा शनिबार भएको फाइनल खेलमा वडा नं. २ लाई १–० ले हराउँदै वडा नं. १ ले उपाधि जितेको हो । पुजन श्रेष्ठको गोल खेलको निर्णायक बनेको थियो ।

रोमाञ्चक फाइनल भिडन्तमा पुजनले खेलको ६० मिनेटमा गरेको गोल निर्णायक बन्न पुग्यो । पुजन खेलको म्यान अफ दि म्याच घोषित भए । विजेता टोलीले ५० र दोस्रो भएको टोलीले २५ हजार रुपैयाँ प्राप्त गरे ।

विजेता, उपविजेता टोलीका खेलाडीलाई प्रदेश सभा सदस्य शोभा लामा, जीतपुरसिमरा उमपहानगरपालिकाका मेयर डा. कृष्ण पौडेल, उपमेयर सरस्वती चौधरी, वडा नं. १ का अध्यक्ष हिराबहादुर गुरुङ, कार्यपालिका सदस्य सुभद्रा न्यौपानेलगायतले पुरस्कृत गरे ।

वडा नं. १ का निरज थापा मगर प्रतियोगिताको सर्वाेत्कृष्ट खेलाडी घोषित भए र उनले ११ हजार रुपैयाँ प्राप्त गरे । निरज नै उत्कृष्ट फरवार्ड चुनिए । प्रतियोगितामा समान ४ गोल गरेका निरज थामामगर र वडा नं. ५ का कृपा चौधरीले उच्च गोलकर्ता बने । दुवैले २ हजार ५ सय रुपैयाँ प्राप्त गरे ।

वडा नं १ का रोहन मगर उत्केष्ट गोलकिपर, रोहन लामा उत्कृष्ट रक्षक र वडा नं २ का प्रज्वल थापा मगर उत्कृष्ट मिडफिल्ड घोषित भए । उनीहरुले समान ५ हजार रुपैयाँ प्राप्त गरे । प्रतियोगिता जीतपुरसिमरा उपमहानगरपालिकाको सहयोगमा सामुदायिक विकासशील क्लबले आयोजना गरेको थियो ।

कार्यक्रममा प्रतियोगिताको प्रवद्र्धकको रुपमा रहेको नेपाल खेलकुद पत्रकार मञ्च बारा, शान्तिसुरक्षा प्रदान गर्ने ईलाका प्रहरी कार्यलय सिमरा, सशस्त्र प्रहरी बेस क्याम्प जीतपुर र विभिन्न ब्यक्तित्वलाई मायाको चिनो प्रदान गरिएको थियो । क्लबका अध्यक्ष दिपक भट्टराईको अध्यक्षतामा सम्पन्न कार्यक्रमको सहजीकरण सुनिल गाँउलेले र स्वागत मन्तव्य सचिव निरज पुडासैनीले राखेका थिए ।