सर्लाही (एजेन्सी)– विभागीय नेपाल एपिएफ क्लब लालबन्दी अन्तर्राष्ट्रिय गोल्डकप फुटबल प्रतियोगिताको च्याम्पियन बनेको छ । राधाकृष्ण खेल मैदानमा शनिबार भएको प्रदेश २ को सर्वाधिक पुरस्कार राशिको प्रथम लालबन्दी गोल्डकपको फाइनलमा अर्को विभागिय टोली नेपाल पुलिस क्लबलाई २–१ ले हराउँदै एपिएफले वर्षको पहिलो उपाधि जितेको हो ।

एपिएफलाई च्याम्पियन बनाउन प्रविण स्याङतान र रुप बहादुर लामाले गोल गरे । पुलिसले उपहार गोल पाएको थियो । खेलको २९ र्औ मिनेटमा प्रविण स्याङतानको गोलबाट एपिएफले अग्रता बनाएको थियो । पहिलो हाफमा १–० को अग्रता बनाएको एपिएफले ७५ औं मिनेटमा आत्मघाती गोल खादा खेल १–१ गोलको बराबरीमा पुग्यो ।

पुलिसका अजित भण्डारीको प्रहारलाई बचाउने क्रममा एपिएफका भरत शाहीले बललाई आफ्नै पोष्टमा गोल गरेका थिए । तीन मिनेटपछि नै रुप बहादुरले गोल गरेपनि एपिएफले पुनः अग्रता लिएको थियो । त्यसअघि पुलिसले छैटौ मिनेटमा प्राप्त पेनाल्टीमा गोल गर्नबाट चुकेको थियो । भोला सिलवालको प्रहार एएिफका गोलरक्षक राजु नगरकोटीले विफल पारेका थिए ।

च्याम्पियन एपिएफले उपाधिसहित ७ लाख र पुलिसले ३ लाख ५० हजार रुपैयाँ प्राप्त गर्यो । एपिएफका प्रविण स्याङतान प्रतियोगिताको सर्वोत्कृष्ट खेलाडी चुनिए र उनले ५० हजार रुपैयाँ प्राप्त गरे । उत्कृष्ट गोलकिपर चुनिएका एपिएफका राजु नगरकोटी २५ हजार रुपैयाँ पाए ।

सर्लाही–११ का सनी चौधरी उदियमान खेलाडी घोषित भए र उन मोटसाइकल प्राप्त गरे । सर्लाही जिल्ला फूटबल संघ र लालबन्दी नगरपालिकाको संयुक्त आयोजनामा जेठ २४ गतेदेखि सुरु भएको प्रतियोगितामा १० टोलीको सहभागिता थियो ।