मस्को (एजेन्सी) – लियोन मेस्सीको अर्जेन्टिनाले यसपटकको विश्व कपको सुरुवात कसरी गर्ने छ भन्ने धेरैको कौतुहलता रहेको छ । स्पेनविरुद्ध पोर्चुगलका कप्तान क्रिस्टियानो रोनाल्डोले ह्याट्रिकपछि अब सबैको नजर मेस्सीमाथि हुनेछ । उनले पहिलो खेलमा कस्तो प्रदर्शन गर्नेछन् भन्ने उनका समर्थकको मात्र होइन आलोचकको पनि नजर रहनेछ ।

अर्जेन्टिना सम्मिलित समूह ‘डी’ का खेलहरु हुदैछन् । दाबेदारका रुपमा हेरिएको दक्षिण अमेरिकी राष्ट्र अर्जेन्टिनाले पहिलोपटक विश्वकप खेल्न लागेको युरोपेली राष्ट्र आइसल्याण्डसँग प्रतिस्पर्धा गर्दैछ । खेल मस्कोस्थित स्पार्कटस स्टेडियममा नेपाली समयअनुसार ६ः४५ बजेपछि शुरु हुनेछ । यी दुवै टोली कुनै प्रतियोगितामा पहिलोपटक खेल्न लागेका हुन् ।

अर्जेन्टिना पहिलो खेलमा आइसल्याण्डलाई पराजित गर्दै दोस्रो चरण पुग्ने सम्भावना बलियो बनाउने योजनामा हुनेछ । उत्कृष्ट एट्याकिङ लाइनअप रहेको अर्जेन्टिनासँग आधुनिक फुटबलका स्टार खेलाडी मेस्सीसँगै सर्जियो अगुएरो, एन्जल डि मारिया जस्ता खेलाडीहरुको साथ रहेको छ । तर, जर्ज साम्पाओलीको अर्जेन्टिनाले दक्षिण अमेरिकी विश्वकप छनोटमा राम्रो प्रदर्शन गर्न सकेको थिएन ।

दुई पटकको विश्व च्याम्पियन अर्जेन्टिनाले रसिया विश्वकपमा छनोट हुनका लागि अन्तिम खेल सम्म कुर्नुपरेको थियो । इक्वेडरविरुद्धको उक्त खेलमा कप्तान मेस्सीले ह्याट्रिक पुरा गरेपछि अर्जेन्टिना विश्वकपलाई छनोट हुन सफल भएको थियो । विश्वकप छनोट र मैत्रीपूर्ण खेलमा मध्यम खेल खेलेको अर्जेन्टिनाले अघिल्लो चरण प्रवेशका लागि राम्रो फुटबल खेल्नुपर्ने हुन्छ ।

अर्जेन्टिनाको लागि पहिलो खेल नै बाधक हुन सक्छ । अर्जेन्टिनाको प्रतिद्धन्द्धी आइसल्याण्डले पछिल्लो दुई वर्षमा गज्जवको फुटबल खेल्दै विश्वको ध्यान नै खिच्न सफल भएको छ । विश्वकप खेल्ने सानो राष्ट्र बनेको आइसल्याण्ड ठुला टिमलाई चुनौती दिन सक्ने टोलीको रुपमा उभिएको छ । दुई वर्षअघि युरोकपमा इंग्ल्याण्डलाई हराएर सनसनी मच्चाएको आइसल्याण्ड विश्वकपको पहिलो खेलमा उपाधिको दाबेदार अर्जेन्टिनालाई स्तब्ध पार्दै अघि बढ्ने लक्ष्यमा हुनेछ ।

स्टार खेलाडीहरु नभएपनि आइसल्याण्डसँग टिमवर्क र बलियो एकता छ । आइसल्यान्डको टिममा गिल्फी सिगुडर्सन सबैभन्दा नाम चलेका ठूला स्टार हुन् । तर, अर्जेन्टिनाविरुद्धको खेल आइसल्याण्डलाई सहज हुनेछैन । किनभने अर्जेन्टिनासँग विश्वस्तरका प्रभावशाली खेलाडीहरूको जमघट छ । तर, अर्जेन्टिनालाई आइसल्याण्डविरुद्धको खेलमा गोलरक्षक टाउको दुखाईको विषय बन्न सक्छ । नियमित गोलरक्षक सर्जियो रोमेरो चोटका कारण टोली बाहिर छन् ।

सुरुवाति ११

अर्जेन्टिना – काबालेरो; फाजियो, रोहो, टागलियाफिको, ओटामेन्डी; मासेरानो, बिग्लिया, डि मारिया, मेजा, मेस्सी; अगुएरो

आइसल्यान्ड – हालडोर्सन; माग्नुसन, रागनार सिगर्डसन, आर्नासन, सेभरसन, जार्नासन, गुनरसन, सिगर्डसन, गुडमुनसन, हालफ्रेडसन, फिन्बोगासोन