एजेन्सी (काजान)- रसिया विश्वकप फुटबलमा उपाधिको दावेदार मध्येको एक फ्रान्सले शनिबार अष्ट्रेलियाविरुद्ध खेल्दै विश्वकपको शुरुवात गर्नेछ । खेल काजानस्थित काजान एरिनामा नेपाली समयअनुसार ३.४५ बजेपछि शुरु हुनेछ ।

यी दुई टिम अहिलेसम्म ३ पटक आमने–सामने भएका छन् । जसमा दुवै टिमले समान १ जित, हार र बराबरीको नतिजा निकालेको छ । यी दुई टिमबीच पछिल्लोपटक २०१३ मा मैत्रीपूर्ण खेल भएको थियो । जसमा फ्रान्सले ६–० को फराकिलो जित निकालेको थियो । त्यसयता भने यी दुई टिमबीच भेट भएको छैन ।

त्यसैले पछिल्लो नतिजा हेर्दा फ्रान्स अष्ट्रेलियमाथि हावी हुने देखिएको छ । अष्ट्रेलियामाथि जितसहित फ्रान्स विश्वकपको सुखल शुरुवात गर्ने लक्ष्यमा हुनेछ । यसपटक फ्रान्सको टिम निक्कै सशक्त बनेको छ । त्यसैले अष्ट्रेलियाविरुद्धको खेलमा सहज जित हात पार्नेमा फ्रान्सका प्रशिक्षक डिडिएर डेसच्याम्प्स ढुक्क छन् ।

फ्रान्सको हरेक पोजिसनमा शुरुवाती ११ सहित बेञ्च पनि निकै बलियो छ । टिममा यस सिजन उत्कृष्ट लयमा रहेको एन्टोअन ग्रिजम्यान फ्रान्सको मुख्य हतियार हुनेछन् । ग्रिजम्यानलाई पाउल पोग्बा, किलियन एमबाप्पे, स्यामुयल उम्मिटी, ह्युगो लाोरिस, एङ्गोलो कान्टे, राफेल भरान, थोमस लेमार र औसमाने डिम्वेलेजस्ता विश्वस्तरका खेलाडीले साथ दिनेछ । उनीहरूमा कुनै पनि समय खेललाई परिवर्तन गर्न सक्ने क्षमता रहेको छ ।

तर, विश्वकप अघिको अभ्यास खेलमा भने फ्रान्सको प्रदर्शन सन्तोषजनक रहेको छैन । विश्वकपबाट बाहिर रहेको इटालीलाई ३–१ ले पराजित गरेको फ्रान्स दोस्रो मैत्रीपूर्ण खेलमा भने अमेरिकासँग १–१ गोलको बराबरीमा रोकिएको थियो । यस्तो अवस्थामा फ्रान्सलाई अष्ट्रेलियाविरुद्धको खेल निकै नै महत्वपूर्ण हुने गर्दछ ।

यता, एसियाली राष्ट्र अष्ट्रेलिया पहिलो खेलमा फ्रान्सलाई स्तब्ध पार्दै अघि बढ्ने लक्ष्यमा हुनेछ । लगातार चौथोपटक विश्वकप फुटबल खेल्न लागेको अष्ट्रेलिया चार वर्षअघिको ब्राजिल विश्वकपमा पीडालाई बिर्सदै आफ्नो प्रभाव देखाउने लक्ष्यमा हुनेछ । अभ्यास खेलमा चेक रिपब्लिक जस्तो बलियो टोलीलाई ४–० ले तथा हंगेरीलाई २–१ ले पराजित गरेर आत्मविश्वासी देखिएको अष्ट्रेलिया त्यही प्रदर्शनलाई फ्रान्सविरुद्ध देखाउने लक्ष्यमा हुनेछ ।अष्ट्रेलियासँग टिम काहिलजस्ता भेट्रान फरवार्डको साथ रहेको छ ।