सिमरा (हाम्रो खेलकुद) –सिमरामा जारी जीतपुरसिमरा उपमहानगर स्तरीय प्रथम मेयर कप फुटबल प्रतियोगिताको उपाधिका लागि वडा नं. १ र वडा नं. २ भिड्ने भएका छन् । सिमरा रंगशालामा बिहीबार भएको दोस्रो सेमिफाईलन खेलमा जीत हात पार्दै वडा नं. २ ले वडा नं. १ संगको उपाधी भिडन्त पक्का गरेको हो । वडा नं. १२ लाई पराजित गर्दै वडा नं. १ यसअघि नै प्रतियोगिताको अन्तिम दुईमा प्रवेश गरिसकेको छ ।

दोस्रो सेमिफाईनल खेलमा वडा नं. २ ले वडा नं. ५ लाई टाईब्रेकरमा ४–२ ले पराजित गरेको छ । निर्धारित समयमा दुबै टिमले १–१ को बराबरी खेलेपछि खेल टाईब्रेकरमा धकेलिएको थियो । प्रतियोगिताकै बलियो टोलि मानिएको वडा नं. ५ लाई टाईब्रेकरमा पराजित गर्ने क्रममा वडा नं. २ का लागि सुशान्त लामा, प्रकाश श्रेष्ठ, अभय लामा र उमेश श्रेष्ठले गोल गरे ।

वडा नं. ५ का लागि श्रीराम चौधरी र कृपा चौधरीको प्रहारले मात्र जाली चुम्यो । वडा नं. ५ का अस्मीत चौधरीको प्रहार पोष्टमा ठोक्किदा रामएकवाल चौधरीको प्रहार बाहिरिएको थियो । यसअघि निर्धारित ७० मिनेटको खेलमा वडा नं. २ ले अग्रता लिएको थियो । खेलको १७औं मिनेटमा बिवश गुरुङले गोल गर्दै टिमलाई अग्रता दिलाएका थिए । बलियो टोली वडा नं. ५ विरुद्ध उत्कृष्ट प्रदर्शन गरेको वडा नं. २ ले केही अवसर गुमाउन पुग्दा जीतका लागि टाईब्रेकरसम्म संघर्ष गर्नुप¥यो ।

प्रतियोगिता अवधीभर उत्कृष्ट प्रदर्शन गर्दै सेमिफाईनल प्रवेश गरेको वडा नं. ५ दवावमा देखियो । पहिलो हाफमा खासै अवसर सिर्जना गर्न नसकेको वडा नं. ५ ले दोस्रो हाफमा आक्रामक प्रदर्शन गर्दै केही अवसर बनाएपनि फिनिसिङमा चुक्न पुगेको थियो । अन्तिम समयसम्म संघर्ष गरेको वडा नं. ५ ले ईन्जुरी समयमा गोल गर्दै खेल बराबरीमा ल्याएको थियो ।

निर्धारित समय सकिएपछि थपिएको चार मिनेट ईन्जुरी समयको अन्तिममा वडा नं. ५ का लागि सुजित चौधरीले गोल गरेका थिए । सुजितको प्रहार रोक्न वडा नं. २ का गोलरक्षक असफल देखिए । सुजित खेलको म्यान अफ दि म्याच घोषित भए । उनलाई वडा नं. २ का अध्यक्ष तिलक श्रेष्ठ, कार्यपालिका सदस्य शोभा कार्कीलगायतले ट्रफि वितरण गरेका थिए । फाईलन प्रवेश गरेको वडा नं. २ ले अब उपाधीका लागि असार २ गते वडा नं. १ संग प्रतिस्पर्धा गर्नेछ ।

जीतपुरसिमरा उपमहानगरपालिकाको सहयोगमा सामुदायिक बिकासशील क्लबले आयोजना गरेको प्रतियोगिताको विजेताले ५० हजार र उपविजेताले २५ हजार प्राप्त गर्नेछ । जेष्ठ १७ गतेदेखि सुरु भएको प्रतियोगितामा उपमहानगरको २४ वटा वडाको सहभागिता रहेको थियो । यसैगरी फाईलन अघि सिमरा रंगशालामा शुक्रवार दुई मैत्रीपूर्ण फूटवल खेल हुने भएका छन् । पहिलो मैत्रीपूर्ण खेल पत्रकार र मेयर कप फुटबल आयोजक सामुदायिक विकासशील क्लबबीच हुनेछ भने दोस्रो सेमिफाईनल खेलमा उपमहानगरको जनप्रतिनिधि र कर्मचारी भिड्नेछन् ।