लन्डन (एजेन्सी)– म्यानचेस्टर युनाइटेडका प्रशिक्षक जोसे माउरिन्होले अनुवभसहितको युवा इङ्ल्यान्ड टोलीले बिहीबारबाट सुरु हुने विश्व कपमा राम्रो प्रदर्शन गर्ने विश्वास व्यक्त गरेका छन् । समूह जीमा रहेको गारेथ साउथगेटको इङ्ल्यान्डले सोमबार ट्युनेसियासँग प्रतिस्पर्धा गर्दै विश्व कपको सुरुवात गर्नेछ ।

साउथगेटको टोलीमा रहेका युवा खेलाडीमा अन्तर्राष्ट्रिय अनुभवको नभएपनि च्याम्पिपयन्स लिग खेलेका कारण त्यो अनुभव फाइदा हुने अनुमान गरिएको छ । म्यानचेस्टरका फिल जोन्स, एस्ले योङ, जिसे लिङ्गार्ड र मार्कुस रासफोर्ड सम्मिलित इङ्ल्यान्डले रसियामा उच्च प्रदर्शन गर्नेमा माउरिन्हो विश्वस्त छन् ।

‘उनीहरु युवा भएपनि अनुभवी खेलाडी छन् । सबैले प्रतिस्पर्धात्मक खेल खेलेका छन्,’ उनले भने, ‘टोलीमा रहेको अधिकांश खेलाडी प्रिमियर लिगमा खेल्छन् । त्यसमध्ये कतिले च्याम्पियन्स लिग खेलेका छन् । निश्चिय नै त्यो फुटबलको स्तर अनुभव हो । मलाई लाग्छ उनीहरुले राम्रो गर्नेछन् ।’

जर्मनी, फ्रान्स, स्पेन र ब्राजिललाई दाबेदार मान्ने माउरिन्होले तर टोलीहरुले सचेत हुनुपर्ने सुझाव दिएका छन् । ‘उनीहरुको खेलाडी क्षमतावान छन् । तर, त्यसमा सधै राम्रो टोली हुन्छ भन्ने छैन,’ उनले भने, ‘कहिले काही ठिकैका खेलाडी भएको टिमले पनि राम्रो प्रदर्शन गरिरहेका हुन्छन । तर मलाई लाग्दैन अन्डरडक टोलीले यसपटक धेरै आश्चार्यजनक निकाल्नेछन् ।’ उनले दक्षिण अमेरिकी र युरोपको टोलीबीच विश्वकप उपाधिका लागि प्रतिस्धर्पा हुने अनुमान गरे ।