काठमाडौं (हाम्रो खेलकुद)– रुस्लान थ्री स्टारले तेस्रो ललित स्मृति यु १८ फुटबल प्रतियोगितामा विजयी सुरुवात गरेको छ । प्रतियोगिताको दोस्रो दिन बुधबार थ्री स्टारले लक्ष्मी हुन्डाई मनाङ मस्र्याङ्दी क्लबलाई १–० ले हराएको छ ।

तस्बिरहरु -विवेक सुवेदी/हाम्रो खेलकुद

सातदोबाटोस्थित एन्फा कम्प्लेक्सको एस्ट्रो टर्फमा शंकर आलेले ४३ औं मिनेटमा गरेको गोललाई जोगाउँदै थ्री स्टारले जित पक्का गरेको हो । प्रतियोगिताको पहिलो दिन साविक विजेता त्रिभुवन आर्मी क्लब र एनआरटी विजयी भएका थिए ।

प्रतियोगिता अन्र्तगत आजै समूह ‘डी’ को अर्को खेलमा फ्रेन्डस् क्लब कुपोन्डोल र सुदूरपश्चिम फुटबल क्लबबीच प्रतिस्पर्धा भइरहेको छ ।प्रतियोगितामा सहभागी सहभागी १८ टोलीलाई चार समूहमा विभाजन गरिएको छ । लिगकम नकआउटका आधारमा हुने प्रतियोगिताको हरेक समूहका शीर्ष दुई टोली क्वार्टरफाइनलमा प्रवेश गर्नेछन् ।

प्रतियोगिता असार २१ गतेसम्म चल्नेछ । प्रतियोगिताको विजेताले ३ लाख रुपैया प्राप्त गर्नेछ । दोस्रो हुनेले १ लाख ५० हजार पाउने एन्फाले जनाएको छ । यस्तै व्यक्तिगत विधातर्फ स्ट्राइकर, मिडफिल्ड, डिफेन्डर, गोलरक्षक र प्रशिक्षकले समान १० हजार प्राप्त गर्नेछन् ।

तीन वर्षअघि करन्ट लागेर मृत्यु भएका अखिल नेपाल फुटबल संघका तत्कालिन कार्यावहाक अध्यक्ष ललितकृष्ण श्रेष्ठको स्मृतिमा प्रतियोगिता आयोजना भएको हो । स्वर्गिय श्रेष्ठ थ्री स्टारको लामो समय अध्यक्ष रहेका थिए ।