मस्को (एजेन्सी) – बेल्जियमका कप्तान एडेन हाजार्डले विश्वकप बेल्जियमले जित्ने अनुमान लगाएका छन् । त्यस्तै बेल्जियमले फाइनलमा इंग्ल्यान्डलाई हराउने समेत अनुमान आफ्नो इन्सटाग्राममार्फत सार्वजनिक गरे ।

बेल्जियम समूह चरणमा पहिलो हुने, अन्तिम १६ मा पोल्यान्डलाई हराउने, क्वाटरफाइनलमा ब्राजिल र सेमिफाइनलमा फ्रान्सलाई हराउने उनको अनुमान रहेको छ ।

त्यस्तै अर्को तर्फ समूह ‘जी’मै रहेको इंग्ल्यान्ड उपविजेता हुंदै अन्तिम १६ मा पुग्ने र त्यहां कोलम्बियालाई हराउने उनले अनुमान गरे । त्यस्तै त्यस्तै इंग्ल्यान्डले क्वाटरफाइनलमा जर्मनी र सेमिफाइनलमा अर्जेन्टिनालाई हराउंदै उपविजेता बन्ने अनुमान गरेका छन् ।

समूह ‘ए’ देखि ‘एच’ सम्मका समूह विजेता क्रमश: उरुग्वे, स्पेन, फ्रान्स, अर्जेन्टिना, ब्राजिल, जर्मनी, बेल्जियम र कोलम्बिया रहने उनको अनुमान छ । त्यस्तै समूह उपविजेतामा इजिप्ट, पोर्चुगल, डेनमार्क, नाइजेरिया, स्विट्जरल्यान्ड, मेक्सिको, इंग्ल्यान्ड र पोल्यान्ड रहने समेत उनको अनुमान छ ।

उनले आफ्नो अनुमानसहितको तस्बिरमा लेखेका छन्,”यो मेरो अनुमान रहेको छ । यहां कैयौं मेरा चेल्सीका सहकर्मी पनि रहेका छन् । तपाईंको अनुमान भने के रहेको छ?” बेल्जियमले हिजो मात्र कोस्टा रिकालाई ४-१ ले हराउंदा हाजार्डको प्रदर्शन प्रशंसनीय रहेको थियो ।

इंग्ल्यान्ड, पानामा र टुनिसियासँग समूह ‘जी’मा रहेको फिफा वरियतामा तेस्रोमा रहेको बेल्जियमलाई यस विश्वकपमा कतिपय विश्लेषकले ‘डार्क हर्स’ भनेका छन् ।

तपाईंको अनुमानमा बेल्जियम प्रतियोगितामा कहांसम्म पुग्ला?