सिमरा (हाम्रो खेलकुद) – वडा नम्बर ८ लाई पराजित गर्दै वडा नम्बर ३ जीतपुर सिमरा नगर स्तरीय प्रथम मेयर कप फुटबल प्रतियोगिताको क्वार्टरफाइनलमा प्रवेश गरेको छ । सिमरा रंगशालामा सोमबार भएको खेलमा वडा नं. ८ लाई ४–१ ले पराजित गर्दै वडा नं. ३ ले अन्तिम आठको यात्रा तय गरेको हो ।

वडा नं. ३ को जितमा कुमार दोङले २ तथा सन्त थिङ र सुरज तामाङले समान १ गोल गरे । वडा नं. ८ का लागि पवन किशोर कुशवाहाले गोल गरे । खेलको पहिलो मिनेटमा गोलको खाता खोलेको वडा नं. ३ ले खेल अवधीभर वडा नं. ८ लाई दबाबमा राख्न सफल भयो । वडा नं. ८ का खेलाडी सम्हालिन नपाउदै खेल सुरु भएको ४० सेकेण्डमा वडा नं. ३ का लागि कुमारले गोल गरेका थिए ।

पहिलो खेलमा वडा नं. २० लाई पराजित गर्दै प्रिक्वार्टरमा प्रवेश गरेको वडा नं. ८ ले आकर्षक खेल प्रदर्शन गर्न सकेन । सुरुवातदेखि दबाब झेलेको वडा नं. ८ ले खेलको २०औं मिनेटमा दोस्रो गोल खान पुग्यो । वडा नं. ३ का सन्तले गोल गर्दै खेल २–० को स्थितीमा पु¥याए । पहिलोमा हाफमा कुनै अवसर बनाउन नसकेको वडा नं. ८ ले दोस्रो हाफमा एक गोल गर्दै खेलमा फर्कने प्रयास गरेको थियो ।

निर्धारित ६० मिनेटको खेलको ३६ औं मिनेटमा वडा नं. ८ का कप्तान पवनकिशोर ले गोल गरे । खेलमा फर्कने प्रयास गरेपनि लय समात्न नसक्दा वडा नंं ८ ले लगातार थप दुई गोल खान पुग्यो । खेलको ५०औं मिनेटमा टिमको लागि गोलको खाता खोलेका कुमारले दोस्रो गोल गरे । त्यसको तीन मिनेट बित्न नपाउदै सुरजले गोल गर्दै टिमलाई ४–१ को जीत दिलाए ।

खेलको म्यान अफ दि म्याच कुमार दोङ घोषित भए । उनलाई वडा नं. ३ का अध्यक्ष जगन्नाथ घिमिरे र वडा नं. ८ का अध्यक्ष रामबाबु कुर्मीले ट्रफि वितरण गरेका थिए । पहिलो खेलमा वडा नं. १० लाई पराजित गर्दै प्रिक्वार्टरमा प्रवेश गरेको वडा नं. ३ ले अब सेमिफाईनल प्रवेशका लागि मंगलवार वडा नं. ५ संग खेल्नेछ । यसैगरी मंगलवार हुने पहिलो खेलमा वडा नं. ७ र वडा नं. १२ भिड्नेछन् ।

जीतपुरसिमरा उपमहानगरपालिकाको सहयोगमा सामुदायिक विकासशील क्लबले आयोजना गरेको प्रतियोगिताको विजेताले ५० हजार र दोस्रो हुने टोलीले २५ हजार रुपैयाँ प्राप्त गर्नेछ ।