लालबन्दी– नुवाकोट गोल्डकप फुटबल प्रतियोगिताको उपाधि जितेको दुई दिनपछि नेपाल पुलिस क्लब लालबन्द गोल्डकप फुटबल प्रतियोगिताको सेमिफाइनलमा पुगेको छ । लालबन्दीको राधाकृष्ण खेल मैदानमा खेलको अन्त्यतिर भोला सिलवालले निर्णायक गोल गरेपछि रुपन्देहीको गोर्खा ब्वाइजलाई सोमबार २–१ ले हराउँदै विभागिय टोली पुलिस अन्तिम चारमा पुगेको हो ।

भोलाले खेल सकिन चार मिनेट बाँकी रहँदा गरेको गोल खेलको निर्णायक बनेको थियो । खेलको सुरुवातमै लिएको अग्रता जोगाउन नसक्दा गोर्खा ब्वाइज पराजित भएको छ । ५६ औं मिनेटमा राम वाजीको गोलबाट पुलिस खेलमा फर्केको थियो । प्रतिस्पर्धात्मक खेलको ८६ औं मिनेटमा भोलालले गोल गर्दै पुलिसलाई जित दिलाए ।

पुलिसले बुधबार रमपम झापा ११ सँग सेमिफाइनल खेल्नेछ । सोमबारको खेलमा पुलिसका राम म्यान अफ दी म्याच घोषित भए र उनले ५ हजार रुपैयाँ प्राप्त गरे । शनिबार नुवाकोट गोल्डकपको फाइनलमा रुस्लान थ्री स्टार क्लब लाई १–० ले हराउँदै पुलिस च्याम्पियन बनेको थियो । यो वर्ष पुलिसको त्यो दोस्रो उपाधि हो ।

सर्लाही जिल्ला फुटबल संघ र लालबन्दी नगरपालिकाले संयुक्त रुपमा आयोजना गरेको प्रतियोगिताको विजेता टोलीले ७ लाख र दोस्रो हुने टोलीले ३ लाख ५० हजार रुपैयाँ प्राप्त गर्नेछ । उदयमान खेलाडीले मोटरसाइकल पाउने प्रतियोगिताको सर्वोत्कृष्ट खेलाडीले ५० हजार रुपैयाँ प्राप्त गर्नेछन् । त्यस्तै प्रतियोगिताका उत्कृष्ट गोलकिपर, रक्षक, मिडफिल्ड, फरवार्ड र प्रशिक्षकले समान १५ हजार रुपैयाँ प्राप्त गर्नेछन् ।

लालबन्दी गोल्डकपमा मंगलबारको क्वार्टरफाइनल
रुस्लान थ्री स्टारविरुद्ध कास्की ११