काठमाडौं (हाम्रो खेलकुद) – ललित स्मृति यु–१८ फुटबल प्रतियोगिताको तेस्रो संस्करण मंगलबार सुरु हुने भएको छ । अखिल नेपाल फुटबल संघ (एन्फा) ले आइतबार पत्रकार सम्मेलन गर्दै प्रतियोगिता मंगलबारबाट सुरु हुने जानकारी दिएको छ । एन्फाको नयाँ कार्यसमिति निर्वाचित भएपछि एन्फाले आयोजना गर्न लागेको यो पहिलो प्रतियोगिता हो ।

प्रतियोगितामा ‘ए’ डिभिजनका १४ र मोफसलका ४ गरी १८ टोलीले प्रतिस्पर्धा गर्ने प्रतियोगिता संयोजक मधुसुदन उपाध्ययले जानकारी गराए । एन्फाले यसअघि नै खेल तालिका सार्वजनिक गरेको थियो । प्रतियोगिताको उद्घाटन खेल न्युरोड टिम एनआरटी र मच्छिन्द्र क्लबबीच हुनेछ । सोही दिन डिफेन्डिङ च्याम्पियन आर्मी क्लब र सरस्वती युवा क्लबबीच खेल हुनेछ ।

रुस्लान थ्री स्टार क्लब र मनाङ–मस्र्याङ्दी क्लब ललित स्मृति यु–१८ फुटबल प्रतियोगिताको एक समूह ‘डी’ मा परेको छ । समूह ‘डी’ मा थ्री स्टार र मनाङसँगै फ्रेन्डस् क्लब, हिमालयन शेर्पा क्लब र सुदूरपश्चिम फुटबल क्लब रहेका छन् । थ्री स्टार र मनाङको खेल जेठ ३० गते दियसको १ः३० बजेपछि हुनेछ ।

सहभागी १८ टोलीलाई चार समूहमा विभाजन गरिएको छ । लिगकम नकआउटका आधारमा हुने प्रतियोगिताको हरेक समूहका शीर्ष दुई टोली क्वार्टरफाइनलमा प्रवेश गर्नेछन् । जेठ २९ गतेबाट शुरु हुने प्रतियोगिता असार २१ गतेसम्म चल्नेछ । प्रतियोगिताको सबै खेलहरु सातदोबाटोस्थित एन्फा कम्प्लेक्सको खेल मैदानमा हुनेछ । यसअघिको दुवै संस्करणमा त्रिभुवन आर्मी क्लब च्याम्पियन बन्न सफल भएको थियो ।

प्रतियोगिता एन्फाका कार्यवहाक अध्यक्ष स्वर्गीय ललितकृष्ण श्रेष्ठको स्मृतिमा हुन लागेको हो । थ्री स्टार क्लबका अध्यक्ष समेत रहेका श्रेष्ठधको २०७२ जेठ २९ गते नयाँ घरमा सर्ने क्रममा करेन्ट लागेर निधन भएको थियो । उनकै सम्झना स्वरुप एन्फाका त्यतिबेलाका कार्यवहाक अध्यक्ष नरेन्द श्रेष्ठ नेतृत्वको एन्फाले स्वर्गीय ललितको स्मृतिमा यु–१८ फुटबल प्रतियोगिता आयोजना गर्ने निर्णय गरेपछि प्रतियोगिता तेस्रोपटक हुन लागेको हो ।

प्रतियोगिताको विजेताले ३ लाख रुपैया प्राप्त गर्नेछ । दोस्रो हुनेले १ लाख ५० हजार पाउने एन्फाले जनाएको छ । यस्तै व्यक्तिगत विधातर्फ स्ट्राइकर, मिडफिल्ड, डिफेन्डर, गोलरक्षक र प्रशिक्षकले समान १० हजार प्राप्त गर्नेछ ।

प्रतियोगिता सञ्चालन गर्न करिव ४० लाख खर्च हुने आयोजकले अनुमान गरेको छ । प्रतियोगितामा सहभागी टिमलाई तयारी स्वरुप १ लाख ५० हजार र उपत्यका बाहिरका टिमलाई थप ५० हजार प्रदान गरिने संयोजक उपाध्ययले जानकारी गराए ।

समूह विभाजन
समूह ‘ए’–त्रिभुवन आर्मी क्लब, सरस्वती क्लब, मछिन्द्र क्लब, एनआरटी र लुम्बिनी फुटबल क्लब
समूह ‘बी’– नेपाल पुलिस क्लब, जावलाखेल, मोरङ फुटबल क्लब र बिग्रेड ब्वाइज क्लब
समूह ‘सी’ – सिएमजी क्लब संकटा, नेपाल एपिएफ क्लब्, झापा–११ र च्यासल युथ क्लब
समुह ‘डी’ – थ्री स्टार, मनाङ, फ्रेन्डस् क्लब, हिमालयन शेर्पा र सुदूरपश्चिम फुटबल क्लब