बट्टार (हाम्रो खेलकुद)– नेपाल पुलिस क्लबले विशाल सिमेन्ट नुवाकोट गोल्ड कप फुटबल प्रतियोगिताको उपाधि जितेको छ । रुस्लान थ्री स्टार क्लबलाई १–० ले हराउँदै विभागिय टोलीले वर्षको दोस्रो उपाधि जितेको हो ।

नेपाल पुलिस क्लबका खेलाडी । फाइल तस्बिर

यससँगै पुलिसले यस सिजन आफ्नो उपाधि सङ्ख्या दुई पुर्‍याएको छ । पुलिसले यसअघि दमक गोल्डकपको उपाधि जितेको थियो । यो सिजन थ्री स्टारले पनि दुई उपाधि जितिसकेको थियो । थ्री स्टारले माइभ्याली गोल्डकप र उदयपुर गोल्डकप जितेको थियो । नुवाकोट आदर्श बहुमुखी क्याम्पसको खेल मैदानमा शनिबार भएको खेलमा पुलिसलाई च्याम्पियन बनाउन रवि पासवानले गरेको एकमात्र गोल नै निर्णायक बन्यो ।

प्रतिस्पर्धात्मक बनेको खेलमा रविले खेलको ५३ औं मिनेटमा गोल गर्दै पुलिसलाई शुरुवाती अग्रता दिलाएको थिए । त्यसपछि दुवै टोलीले गोल गर्न नसक्दा रविको गोल नै निर्णायक बन्यो । उपाधिसँगै नेपाल पुलिसले ५ लाख रुपैयाँ पुरस्कार पनि प्राप्त गर्‍यो । उपविजेता थ्री स्टारले ३ लाखा चित्त बुझायो ।

पुलिसका रवि पासवान प्रतियोगिताको सर्वाेत्कृष्ट खेलाडी भए । थ्री स्टारका अजायी मार्टिन ३ गोलसहित सार्वाधिक गोलकर्ता भए । पुलिसका अनन्तराज थापा उत्कृष्ट प्रशिक्षक चुनिए । विजेयी टिम तथा खेलाडीलाई युवा तथा खेलकुद मन्त्री जगतबहादुर विश्वकर्माले ट्रफी तथा पुरस्कार प्रदान गरेका थिए ।

जिल्ला खेलकुद विकास समिति नुवाकोट र नुवाकोट जिल्ला फुटवल संघको आयोजनामा सञ्चालन भएको प्रतियोगितामा जेठ १७ गतेबाट शुरु भएको प्रतियोगितामा १० टिमले सहभागिता जनाएका थिए ।