बट्टार (हाम्रो खेलकुद) – नुवाकोटमा जारी विशाल सिमेन्ट नुवाकोट गोल्डकप फुटबल प्रतियोगिताको उपाधिको लागि आज रुस्लान थ्री स्टार क्लब र नेपाल पुलिस क्लबबीच प्रतिस्पर्धा हुँदैछ । दुवै टोलीका प्रशिक्षकले फाइनलका लागि आफ्नो टोली तयार रहेको र उपाधि जित्ने विश्वास व्यक्त गरको छन् ।

पुलिसका प्रशिक्षक अनन्तराज थापाले नुवाकोटको मैदान तुलानात्मक रुपमा राम्रो भएकोले खेलाडीलाई खेल्न सहज हुनेछ । ‘मैदान निक्कै राम्रो छ । खेलाडीले सहज तरिकाले खेलिरहेका छन् । ‘विपक्षी टोली पनि बलियो टोली हो ,’  प्रशिक्षक थापाले शुक्रबार पत्रकार सम्मेलनमा भनेका थिए, ‘तर, हामी विपक्षीलाई रोक्दै उपाधि जित्ने लक्ष्यमा हुनेछौं । उपाधि जित्न आतुर छौं ।’

थ्री स्टारका प्रशिक्षक मेघराज केसीले नुवाकोटमा फुटबलको वातावरण निकै राम्रो रहेको भन्दै आफुहरु फाइनलमा उत्कृष्ट खेल खेल्दै उपाधि जित्ने बताए । ‘विपक्षी पुलिस पनि उपाधिको दावेदार टोली हो । खेल बराबरीकै अवस्थामा हुनेछ । जसले पाएको मौकालाई गुमाउदैन उ नै च्याम्पियन बन्नेछ ।’ प्रशिक्षक केसीले भने, ‘हामी विगत ७/८ महिना देखि नियमित फुटबल खेलिरहेका छौं । कहिले पुलिसले जितेको छ । कहिले हामीले जितेका छौं । खेलमा केही भन्न सकिदैन । जसले राम्र्र्रो खेल्छ, त्यही टिम नै च्याम्पियन बन्नेछ ।’

थ्री स्टार यो सिजन तेस्रो उपाधिको खोजीमा हुनेछ । थ्री स्टारले यसअघि इलाममा भएको माईंभ्याली गोल्डकप र उदयपुरमा भएको उदयरपुर गोल्डकपको उपाधि जितेको थियो । दुवै प्रतियोगिताको उपाधि जित्दा थ्री स्टारले मनाङ–मस्र्याङ्दी क्लबलाई पराजित गरेको थियो । यता, पुलिस यो सिजन दोस्रो उपाधिको खोजीमा हुनेछ । पुलिसले यसअघि दमक गोल्डकपको उपाधि जितेको थियो । पुलिसले फाइनलमा मनाङलाई नै पराजित गरेको थियो ।

उक्त प्रतियोगितामा पुलिसले थ्री स्टारलाई क्वार्टरफाइनलमै पराजित गरेको थियो । थ्रीस्टारले क्वाटरफाइनलमा मदन भण्डारी स्पोर्टस् एकेडेमीलाई ३—२ गोल अन्तरले र सेमिफाइनलमा घरेलु टोली नुवाकोटलाई ४—१ गोल अन्तरले पराजित गर्दै फाइनलमा पुगेको हो ।

नेपाल पुलिस क्लब रुपन्देही ११ लाई ३ —० गोल अन्तरले पराजित गर्दै क्वाटरफाइनलमा प्रवेश गरेको हो भने पोखरालाई ट्राइबेकरमा ३—२ गोल अन्तरले पराजित गर्दै फाइनलमा पुगेको हो । प्रतियोगीतामा प्रथम हुने टोलीलाई ५ लाख रुपैयाँ र दोस्रो हुनेले ३ लाख रुपैयाँ नगदसहित ट्रफि पाउने बताइएको छ । प्रतियोगिता जिल्ला खेलकुद विकास समिति नुवाकोट र नुवाकोट फुटवल संघले संयुत्त रुपमा आयोजना गरेको हो ।