लालबन्दी (हाम्रो खेलकुद)– नेपाल एपिएफ क्लब लालबन्दी गोल्ड कप फुटबल प्रतियोगिताको क्वार्टरफाइनलमा पुगेको छ । भारतको युनाइटेड सिक्किमलाई टाइब्रेकरमा ४–१ ले हराउँदै एपिएफ अन्तिम आठमा पुगेको हो । एपिएफले आइतबार हुने क्वार्टरफाइनलमा हेटौडाको विजय युथ क्लबको सामना गर्नेछ ।

राधाकृष्ण खेल मैदानमा शुक्रबार निर्धारित समय २–२ को बराबरीमा टुंगिएपछि नेपाल्टी सुट आउटमा एपिएफले बाजी मारेको थियो । पेनाल्टीमा एपिएफका नवीन लामा, सुदीप सिख्राकार, श्याम नेपाली र शिवराम गिरीले गोल गरे । युनाइटेडका लागि नागेन तामाङ मात्र गोल गर्न सफल भए ।

खेलको पहिलो हाफमा २–२ को बराबरी भएको थियो । एपिएफले दुई पटकको अग्रतालाई जोगाउन सकेन । श्याम नेपालको गोलबाट एपिएफले सातौं मिनेटमा अग्रता लिएको थियो । तर, पेल्साङ लामाले १३ औं मिनेटमा युनाइटेड सिक्किमका लागि बराबरी गोल फर्काए ।

प्रविण स्याङ्तानको गोलमा १५ औं मिनेटमा एपिएफले पुनः अग्रता लियो । त्यो अग्रता पनि लामो समय टिकेन । नागेनले २७ औं मिनेटमा बराबरी गोल गरे । युनाइटेका नागेन म्यान अफ दी म्याच बने ।

सर्लाही जिल्ला फुटबल संघ र लालबन्दी नगरपालिकाले संयुक्त रुपमा आयोजना गरेको प्रतियोगिताको विजेता टोलीले ७ लाख र दोस्रो हुने टोलीले ३ लाख ५० हजार रुपैयाँ प्राप्त गर्नेछ । उदयमान खेलाडीले मोटरसाइकल पाउने प्रतियोगिताको सर्वोत्कृष्ट खेलाडीले ५० हजार रुपैयाँ प्राप्त गर्नेछन् ।

त्यस्तै प्रतियोगिताका उत्कृष्ट गोलकिपर, रक्षक, मिडफिल्ड, फरवार्ड र प्रशिक्षकले समान १५ हजार तथा प्रत्येक खेलको म्यान अफ दी म्याचले ५ हजार रुपैयाँ प्राप्त गर्नेछन् । असार २ गते सम्म चल्ने प्रतियोगितामा १० टोलीको सहभागिता रहेको छ ।

लालबन्दी गोल्डकपमा शनिबार पहिलो क्वार्टरफाइनल
रमपम झापा ११ विरुद्ध जावलाखेल युथ क्लब