काठमाडौं (हाम्रो खेलकुद) – विश्व खेलकुदको सर्वाधिक लोकप्रिय प्रतियोगिता, विश्वकप फुटबल २०१४ जुन १४ देखि रुसमा सुरु हुंदैछ । हाम्रो खेलकुद डटकमको ‘विश्वकपमा हेर्नलायक २० खेलाडी’ को सातौं स्थानमा रहेका छन् इंग्ल्यान्डका स्ट्राइकर ह्यारी केन ।

इंग्ल्यान्ड सधै ठूला प्रतियोगिता अघि निकै आकर्षक देखिने गर्छ । तर, तालमेल र सही संयोजनाको कमिका कारण इंग्ल्यान्डका समर्थक निराश हुने गर्छन् । यही कारण स्टेभेन जेरार्ड, फ्रांक लाम्पार्ड, वायन रुनी र डेभिड बेक्हाम लगायतको टोली पनि इतिहासमा उपाधिविहीन रहेको छ ।

तर, यस विश्वकपमा इंग्ल्यान्डलाई सो परिवर्तन गर्ने मौका रहेको छ । यस इंग्ल्यान्ड टोलीको मुख्य भरोसा उसका कप्तान ह्यारी केन नै रहेका छन् । केन उच्च स्तरमा ४ सिजनदेखि निरन्तर प्रदर्शन गरिरहेकाले प्रशिक्षक ग्यारेथ साउथगेटले उनलाई कप्तानको भुमिका सुम्पेका हुन् ।

केनको अघिल्लो वर्ष जादुयी रह्यो । उनले २०१७ को सर्वाधिक गोल गर्ने सुचीमा लियोनल मेस्सी र क्रिस्टियानो रोनाल्डोलाई पनि पछि पारेका थिए । त्यस्तै समग्र सिजनमा मात्र मोहम्मद सालाह र मेस्सीले उनीभन्दा बढी गोल गर्न सफल भएका थिए ।

२४ वर्षे टोटनह्यामका स्ट्राइकर केन आफ्नो बलियो प्रहारका लागि चिनिन्छन् । डि बक्सभित्र खाली ठाउं सिर्जना गर्न र हेडिङका लागि पनि उत्तिकै माहिर छन् । सोझो रुपमा भन्दा उनी एक पूर्ण स्ट्राइकर हुन् ।

तर इंग्ल्यान्डसँग विश्वकपमा कप्तानको रुपमा पनि उनको भुमिका महत्त्वपूर्ण हुन्छ । इंग्ल्यान्ड दाबेदार नमानिए पनि यस टोली निकै युवा छ र यस टोलीमा जोश र गति रहेको छ । इंग्ल्यान्ड आफ्ना बलिया पक्षहरुमा केन्द्रित रहेर प्रदर्शन गर्न सके ठूला टोलीहरुलाई निराश पार्ने क्षमता पनि उसमा रहेको छ, र केनले पनि आफ्नो गोल र नेतृत्वले टोलीलाई सघाउन पर्ने हुन्छ ।