नेपालगञ्ज (हाम्रो खेलकुद) – ए डिभिजन टोली सिएमजी क्लब संकटा क्लब तेस्रो टुबोर्ग नेपालगञ्ज गोल्डकप फुटबल प्रतियोगिताको फाइनलमा प्रवेश गरेको छ । सुदूरपश्चिम–११ लाई बिहिबार ट्राइबेकरमा ३–१ ले पराजित गर्दै संकटा फाइनलमा प्रवेश गरेको हो । संकटा गतवर्ष पनि फाइनलमा पुगेको थियो । निर्धारित समय २–२ को बराबरीमा टुंगिएपछि खेल पेनाल्टी सुट आउटमा भएको थियो ।

खेलको सुरुवाती ६ मिनेटमै विजय सिंहको गोलले सुदूरपश्चिमलाई अग्रता दिलाएका थिए । दोस्रो हाफको तीन मिनेटमै एलोन म्याक्सवेलले गोल गरेर बराबरी गरेका थिए । ७० मिनेटमा पुनः म्याक्सवेलले गोल गरेर संकटालाई अग्रता दिलाए । त्यो अग्रता भने तीन मिनेटमै सुदूरपश्चिमले बराबरी गरेको थियो । सुदूरपश्चिमका चेतन कठायतले गोल गरेर खेललाई बराबरीमा ल्याएका थिए ।

ट्राइबेकरमा संकटाका सरोज दाहाल, रोमन लिम्बु र भुवन सुब्बाले गोल गरेका थिए । सुदूरपश्चिमका चेतन थारु मात्र गोल गर्न सफल भए । टोलीका लागि पेनाल्टीको सुरुवात गरेका नरेन्द्र चौधरीले बाहिर हाने भने विजय सिंह र योगेन्द्र चौधरीको प्रहार संकटाका किपर दिनेश थापाले रोकेका थिए ।

सुदूरपश्चिमका व्यवस्थापक सुरेश हमालले आफ्ना रक्षापंक्तिका खेलाडी घाइते हुँदा निर्धारित समयमा बराबरीमा टुंगिएको बताए । उनले प्रशिक्षक निना नै आफ्ना खेलाडीले राम्रो खेलेको बताए । संकटाका प्रशिक्षक जुजुकाजी डंंगोलले गर्मीका बावजुद टीमले राम्रो खेलेको बताए । संकटाका कप्तान कप्तान सरोज दाहालले स्वभाविक खेल खेल्न नसकेको बताए ।

संकटाले फेरि एक पटक सुदूरपश्चिमलाई घर फर्काएको छ । दोस्रो टुबोर्ग नेपालगञ्ज गोल्डकपमा पनि संकटाले सुदूरपश्चिमलाई सेमिफाइनलमा पराजित गरेको थियो । संकटाले अब उपाधिका लागि लाली रुपन्देही–११ संग शनिबार प्रतिस्पर्धा गर्नेछ । दोस्रो संस्करणमा यी दुई टोली फाइनलमा पुगेका थिए भने रुपन्देहीले बाजी मारेको थियो ।

५ लाख पुरस्कारको नेपालगञ्ज गोल्डकप फुटबल प्रतियोगिताकाको उत्कृष्ट खेलाडीलाई मोटरसाइकल पाउनेछन् । यसैबीच, टिकट काटेर फुटबल हेर्ने एकजनाले मोबाइल पाएका छन् । आयोजकले लक्की ड्रबाट टिकट ८६ का सम्राटलाई मोबाइल दिएको हो ।